Әзербайжан президенті Ильхам Әлиев Астанаға келді (фото)

Әзербайжан президенті Ильхам Әлиев Орталық Азия мемлекеттері басшыларының VI консультативтік кездесуіне қатысу үшін Астанаға келді. Құрметті қонақты әуежайдан премьер-министр Олжас Бектенов күтіп алды, деп хабарлайды үкімет Telegram-дағы арнасында.

Қазақстан мен Әзербайжан арасындағы екіжақты қатынастар сауда-экономикалық және мәдени-гуманитарлық өзара іс-қимылдың барлық спектрі бойынша дамып келеді. Өткен жылдың қорытындысы бойынша Қазақстан мен Әзербайжан арасындағы тауар айналымы 14,3%-ға артып, 529,4 млн долларды құрады, биылғы қаңтар-маусым айларында 280,6 млн долларға жетті.

Үкіметтер мұнай-газ, көлік-логистика, цифрлық коммуникация және ғарыш өнеркәсібі салаларында бірлескен жобаларды іске асырып келеді. Оның ішінде Транскаспий халықаралық көлік бағыты шеңберінде Каспий теңізінің түбімен оптикалық-талшықты байланыс желісін және терең су электр кабелін тарту жобалары бар. Сондай-ақ екіжақты ынтымақтастық әлеуетін ашу мақсатында бірлескен тікелей инвестиция қоры құрылды.

Айта кетсек, аймақтық ынтымақтастықты тереңдету мен кеңейтуге бағытталған Орталық Азия мемлекеттері басшыларының консультативтік кездесулері 2018 жылдан бері өткізіліп келеді. Кейінгі бес жылда (2018-2023 жылдар) өзара сауда көлемі 5,7 млрд доллардан 11 млрд долларға дейін өсті. Қазақстанның ОА елдерімен сауда-саттық көлемі өткен жылы 26,8%-ға өсіп, 8 млрд долларға жетті.

Мәтіннен қате тапсаңыз, бізге жазыңыз