Қазақстаннан тағы бір елге тұрақты рейс ашылуы мүмкін

2025 жылы Қазақстан мен Иордания арасында тұрақты әуе қатынасын ашу туралы келіссөздер жүргізілмек. Бұл туралы KAZ.NUR.KZ Азаматтық авиация комитетінің мәлімдемесіне сілтеме жасап хабарлайды.

Азаматтық авиация комитеті өзінің Telegram-дағы арнасында Қазақстан мен Иордания арасындағы сауда-экономикалық және мәдени-гуманитарлық ынтымақтастық жөніндегі үкіметаралық комиссия отырысының қорытындылары туралы ақпарат таратты. Кездесу Иордания астанасы Амманда өтті.

"Тікелей әуе қатынасын орнатудың маңыздылығы атап өтілді. Сонымен қатар Қазақстан тарапынан Иорданияға теміржолға қажетті материалдарды (рельстер, шпалдар, бекітпелер және т.б.) жеткізуге дайындық білдірілді.

2025 жылдың бірінші жартыжылдығында екі ел арасында тұрақты рейстер ашуға мүмкіндік беретін келісімге қол қою жоспарланып отыр", - делінген комитет хабарламасында.

Комиссияның келесі отырысы Астанада өтеді деп жоспарланған.

Еске сала кетсек, осы жылдың қазан айында Қазақстанның көлік министрлігі елге тікелей рейстері бар мемлекеттердің тізімін жариялады. Онда барлығы 32 ел қамтылған, алайда Иордания бұл тізімге кірмеген.

Мәтіннен қате тапсаңыз, бізге жазыңыз