Стамбұл маңында болған жер сілкінісі: Тоқаев Ердоғанға қолдау білдірді

Мемлекет басшысы Стамбұл маңында болған жер сілкінісіне байланысты Түркия президентіне жеделхат жолдады, деп хабарлайды Ақордаға сілтеме жасаған KAZ.NUR.KZ.

Мемлекет басшысы Қасым-Жомарт Тоқаев Түркия президенті Режеп Тайип Ердоғанға Мәрмар теңізі мен Стамбұл шаһары аумағында орын алған жер сілкінісіне байланысты алаңдаушылық білдіріп, қолдау сөзін жолдаған.

"Сан ғасырлық достық пен бауырластығымызға және елдеріміз арасындағы стратегиялық әріптестікке сүйене отырып, біз түрік халқына әрдайым қолдау көрсетіп, барынша көмек беруге дайын екенімізді растаймыз", - делінген Қазақстан президентінің жеделхатында.

Естеріңізге сала кетейік, 21 сәуірде Түркияда магнитудасы 6,2 болатын жер сілкінісі тіркелді. Жер сілкінісінің ошағы Стамбұл провинциясының Силиври ауданында болған.

Стамбұлда жерасты дүмпулері қайталанған.