Тоқаев Румыния президентіне құттықтау жеделхатын жолдады

Мемлекет басшысы Румыния президенті Никушор Данға құттықтау жеделхатын жолдады, деп хабарлайды Ақордаға сілтеме жасаған KAZ.NUR.KZ.

Қасым-Жомарт Тоқаев Никушор Данды Румыния президенті лауазымына сайлануымен құттықтаған.

"Бұл жеңісіңіз – халқыңыздың сізге және Румынияның дамуын баянды етуге бағытталған маңызды жоспарларыңызға көрсеткен қолдауы мен сенімінің айқын дәлелі деп білемін.

Бірлескен күш-жігеріміздің арқасында Астана мен Бухарест арасында қалыптасқан дәстүрлі достық пен өзара тиімді ынтымақтастық алдағы уақытта да нығая түсетініне үмітім зор", - делінген жеделхатта.

Айта кетейік, 18 мамырда Румынияда өткен президент сайлауының екінші кезеңінде ел астанасы Бухаресттің қазіргі мэрі Никушор Дан жеңіске жетті. Ол президент қызметіне 26 мамырдан бастап кіреседі деп күтіліп отыр.

Мәтіннен қате тапсаңыз, бізге жазыңыз