Тоқаев АҚШ пен Иранның бітімге келуіне қатысты пікір білдірді

Мемлекет басшысы Қасым-Жомарт Тоқаев Таяу Шығыстағы соғысты тоқтату және бітімге келу туралы келісімге қол жеткізілуін құптайды. Бұл туралы президенттің баспасөз хатшысы Айбек Смадияров мәлімдеді, деп хабарлайды KAZ.NUR.KZ.

Айбек Смадияровтың жазуынша, президент Қасым-Жомарт Тоқаев Пәкістан премьер-министрі Шахбаз Шариф пен Пәкістан Қарулы күштерінің бас қолбасшысы, фельдмаршал Асим Мунирдің араағайындығы арқылы Таяу Шығыстағы соғысты толық тоқтату және бітімге келу туралы келісімге қол жеткізілуін құптайды.

"Бұл келісім АҚШ президенті Дональд Трамптың және Иранның жоғарғы басшылығының, сондай-ақ әскери қақтығысқа қатысқан елдердің ізгі ниеті мен парасаттылығының арқасында мүмкін болды.

Мемлекет басшысы әлемдік сауданың дамуына және барлық мемлекеттің экономикалық өркендеуіне жағдай жасау мақсатында қол жеткізілген бітімгершілік келісімнің ұзақ мерзімді сипатқа ие болатынына үміт білдірді", - делінген хабарламада.

Естеріңізге сала кетейік, бұған дейін АҚШ пен Иран екі аптаға атысты тоқтату туралы келісімге келгені белгілі болды.

АҚШ президенті Дональд Трамптың айтуынша, Вашингтон Тегераннан "келіссөздер үшін оңтайлы негіз болатын" 10 тармақтан тұратын ұсыныс алған.

Келіссөздер жұма, 10 сәуірде Пәкістан астанасы Исламабадта басталады.

Мәтіннен қате тапсаңыз, бізге жазыңыз