Мадоннаның өзіне киім тігіп, Louis Vuitton-да басшылық қызмет атқарған қазақ кім

Тері­ден киім тігу шебері Мұстафа Услуджан жиырма жасында Францияға көшіп, он бес жыл­дай Louis Vuitton сән үйінде теріден киім тігетін топтың басқарушысы қызметін атқарып, сосын Balenciaga-ға жұмысқа ауысқан. Есімі әлемге мәшһүр америкалық әнші Мадоннаға ар­найы киім тіккен ол қазір Chanel компания­сында жұмыс істейді. Алдағы уақытта қандасымыз Франция­д­ан Қа­зақстанға арнайы келіп, қазақ бала­ларына тері­ден түрлі бұйым жасауды үйретуді мақсат етіп жүр деп жазады "Түркістан" газеті.

Мұстафа Услуджан киім тігуді 13 жасында Түркияда үйренген. Айтуынша, әке-шешесі - Алтайдан басталған көш керуенімен бірге Үндістан, Пәкістан ар­қылы 1953 жылы Түркияға жеткен қа­зақ­тар.

"Әке-шешем – Алтайдан басталған көш керуенімен бірге Үндістан, Пәкістан ар­қылы 1953 жылы Түркияға жеткен қа­зақ­тар. Бастапқыда біздің әулет Түр­кияның Алтай деген ауылына тұрақ­тады. Сосын 1974 жылы отбасымызбен бір­ге Стамбұлға көшіп, сол жерде өсіп-өн­дік.

Сосын 1983 жылы жиырма жасымда Фран­цияға жалғыз өзім жұмыс істеуге келдім. Әдепкіде француз тілін білмегендік­тен жұмыс табу қиынға соқты.

Бірақ теріден киім тіге білетіндіктен жұмыссыз қал­майтынымды білдім. Сөйтіп, бір жерден жақсы жұмыс табыла кетіп, осы іспен кәсіби түрде шұғылдана бастадым.

Қазір есеп­теп қарасам, осы кәсіптің нәсібін көріп келе жатқаныма отыз сегіз жылдай уақыт бо­лыпты. Кейін киім тігумен айна­лы­сатын түрлі компанияларда жұмыс істедім. Со­сын Hermès сән үйінде, одан соң Louis Vuitton компаниясында он бес жыл еңбек етіп, басқарушы қызметін атқардым.

Онда қоластымда қызмет ететін тігіншілерге «Мынау былай тігіледі. Ана киімді былай тігу керек» деп ақыл-кеңесімді айтып, тү­зету енгізіп отыратынмын. Сосын 2014 жылы Balenciaga сән үйіне ауыстым. Ал қазір Balenciaga-дағы жұмыс орнымды ауыс­тырып, Chanel компаниясына жұмыс істеп жатқаныма екі айдың жүзі болды", - дейді ол.

Мұстафа Услуджанның әпкесі мен жездесі де Louis Vuitton сән үйінде жұмыс істейді екен. Одан бөлек, Chanel компаниясында жұмыс істейтін қазақтар аз емес.

"Жалпы, Париждегі әй­гілі сән үйлерінде киімді керемет тігетін қа­зақтар жетерлік. Әрқайсысында екі-үш қа­зақ жұмыс істейді. Одан бөлек, бір қазақ жі­гітінің жеке тігін фабрикасы бар", - дейді маман.

Айта кетерлік жайт, тігінші тіпті әлемге әйгілі әнші Мадоннаның өзіне шапан тіккен екен.

"2008 жылы Chanel сән үйінің басшысы болған әйгілі неміс модельері Карл Лагерфельдтің тапсырысы бойынша Мадоннаға арнайы теріден қысқа шапан тіккен болатынмын. Негізі, танымал адамдарға киім тігу бойынша тапсырыстар жиі түседі. Өзіңіз білетіндей, дүниежүзіне танымал адамдардың көбі француздық сән үйлері жасап шығаратын өнімдерге қатты қызығады", - дейді ол.

Қандасымыздың өзінің жүрегінде сақтап жүрген арманы да жоқ емес. Ол атажұртқа келіп, қазақ балаларынан теріден киім тігуді үйретуде армандайды.

«Қазір жасымыз 55-60-қа келіп қалды. Енді қалған ғұмырымызды Қазақстандағы балаларға теріні қалай кептіретінін, қалай пішетінін, сосын қалай тігетінін үйретуге арнасақ деп едік» деп айтамын. Әзірге, нәсіп болмай тұр. Осыдан екі жыл бұрын киімді мықты тігетін бір жолдасым атажұртқа теріден киім тігу­ді үйретемін деп барған еді, бірақ жоспары іске аспады.

Десек те, Louis Vuitton, Balenciaga, Chanel секілді компа­ния­лар­да тынбай еңбектеніп жүріп, жиған-терген тәжірибеміз бар, әкемізден үйрен­геніміз бар, осының барлығын қазақ бала­лары­на үйреткім келеді. Түркияда өсіп-өнсек те, жиырма жасымнан бері Фран­цияда жүрсем де, Қазақстан десе елеңдеп отыратынымыз рас. Алматы немесе Нұр-Сұлтан қалалары­нан тігіншілік­ке баулитын мектептер ашсақ, оған он алты немесе он жеті жастағы балаларды қабылдап, оларға барлығын ба­сынан бастап үйретсек, шіркін", - деген ойын жеткізді ол.

Авторы: Әлия Тілеужанқызы