21 жастағы Малика Каримова "Қостанай аруы" атанды (фото)

"Қостанай аруы-2021" атағын кім жеңіп алғаны белгілі болды. Сұлулық байқауының бас жүлдесі 21 жастағы Малика Каримоваға бұйырған. Бойжеткен бүгінде төртінші курс студенті. Ол кәсіби түрде спортпен шұғылданады деп жазады KAZ.NUR.KZ.

Маликаның өңірлік сұлулық байқауында жеңіске жеткені туралы "Қазақстан аруының" ресми парақшасынан белгілі болды.

Бойжеткен Қостанай өңірлік университетінде "Дене шынықтыру және спорт" мамандығы бойынша білім алуда. Малика 10 жыл бойы гандболмен кәсіби түрде айналысады. Ол спорттың бұл түрінен Қазақстан чемпионы. Оған қоса, бойжеткен спорт шеберіне үміткер екені белгілі.

"Құттықтап жатқан жандарға үлкен алғыс. Жылы сөздеріңіз бен қолдауларыңыз үшін рахмет. Мен өте қуаныштымын. Республикалық байқауда қаламыздың намысын абыроймен қорғауға барымды саламын. Бұл мен үшін үлкен мәртебе", - деп жазды ол Instagram парақшасында.

Айта кетерлігі, биыл "Қазақстан аруы" ұлттық байқауының өңірлік турлары онлайн-форматта өтуде. Еліміздің әр өңіріндегі үміткер аруларды ұлттық қазылар алқасы таңдайды. Олар өтінімдерді қарап, әр қатысушы қызбен онлайн түрде тілдеседі.

Қазылар алқасы құрамына биыл актер Тәуекел Мүсілім, әнші Мадина Сәдуақасова, "Қазақстан аруы-2013" Айдай Исаева мен KFW негізін қалаушы дизайнер, стилист AlexChzhen кірді.

Еске сала кетейік, бұған дейін "Түркістан аруы-2021" байқауында кім жеңіске жеткені белгілі болды. 18 жастағы Сұлтанбибі Шахапова "Қазақстан аруы" байқауында өз өңірінің намысын қорғайтын болады.

Сонымен қатар, қазылар алқасы "Атырау аруын" да анықтады. Өңірлік байқауда Әйгерім Сүйінова есімді бойжеткен жеңіске жеткен.

Мәтіннен қате тапсаңыз, бізге жазыңыз