Жаңа қызметке тағайындалған Ринат Зайытов жалақысы қанша екенін айтты

Жақында лауазымды қызметке тағайындалған айтыскер ақын Ринат Зайытов журналист Нартай Аралбайұлының Youtube арнасына сұқбат беріп, жаңа қызметіне қатысты ойын айтты деп хабарлайды KAZ.NUR.KZ.

"Ұжымды басқару – ұжыммен тіл табысу. Сосын жауапкершілікті мойныңа алу. Мен әу бастан жауапкершілік алудан қашқан жоқпын. Өзім айтқан сөзім үшін де, істеген ісім үшін де. Дәл сондай жауапкершілік мойныма ресми түрде жүктелді", – деп түсіндірді жаңа қызметін айтыскер ақын. 

Оның айтуынша, жаңа қызметіндегі айлығы шамамен 200 мың теңге. Ал өзі директор болған өнер ордасының жылдық бюджеті 17-18 миллион теңге.

"Ең бірінші еден жуушылармен сөйлестім. Олардың нақты айлығын білемін. Ең көбі – 56 мың теңге. Ол жерде жұмыс істейтін әнші-әртістің айлығы 100 мың теңгеден аспайды. Оның сыртында Алматы қаласының әкімдігінің тапсырмасы бар: "Ринат, ұлттық өнер ақсап барады. Мына жақты реттеу керек. Айғайлағанда адалмын дейсің ғой, істеп көр" деп ұсыныс айтты", – дейді айтыскер.

Сонымен қатар, Ринат Зайытов "оққағарыңыз бар ма?" деген Нартай Аралбайұлының сұрағына таңданыспен жауап берді.

"Кім атайын деп жүр мені? Атқысы келген адам оққағарға қарамайды ғой", – деді Зайытов.

Естеріңізге сала кетсек, жақында айтыскер ақын Ринат Зайытов Алматыдағы "Алатау" дәстүрлі өнер театрының директоры болып тағайындалған болатын.

Ұжымға жаңа басшыны Алматы қаласы мәдениет басқармасының басшысы- Ғани Айдарұлы Майлыбаев таныстырған.

Мәтіннен қате тапсаңыз, бізге жазыңыз