Қазақстандық рэпер Yenlik халықаралық танымал шоуға қатысты

Yenlik есімімен танылған қазақстандық жас орындаушы Еңлік Құрарбек COLORS халықаралық музыкалық шоуының жаңа шығарылымына қатысты, деп хабарлайды KAZ.NUR.KZ.

Yenlik COLORS жобасында "Bipl" атты синглын орындады. Ол аталған шоуға шақырту алған алғашқы қазақ орындаушысы атанды.

"COLORS өзінің алғашқы қазақстандық әртісін қарсы алады", - деп таныстырды Instagram желісінде Yenlik-ті жоба авторлары.

Бұған дейін COLORS жобасына Billie Eilish, Drake, Doja Cat, Tyla, Joji, Kali Uchis, Daniel Caesar сынды әлемге әйгілі әртістері қатысқан.

Айта кетейік, ColorsxStudios – 2016 жылы құрылған Германияның музыкалық платформасы. Бірнеше жыл ішінде жоба бұрынғы радиостудияда басталған шағын стартаптан әлемдегі ең ықпалды музыкалық арналардың біріне айналды.

Жоба өзінің минималистік эстетикасымен ерекшеленеді, әр шығарылым біртүсті фондағы сахнада, декорациясыз және көзді алаңдататын визуалды элементтерсіз түсіріледі. Мұндай формат тыңдарманның назарын тек музыкаға, дауысқа және орындаушының сахнадағы болмысына аударуға мүмкіндік береді. COLORS-тың YouTube-тегі арнасына жазылған желі қолданушыларының саны бүгінде 8,2 млн-нан асты.

Мәтіннен қате тапсаңыз, бізге жазыңыз