Астаналықтар шырайлы шымкенттіктер өткізген көрмеге лек-легімен ағылды

Астанада қаланың 20 жылдығына орай ұйымдастырылған мәдени шаралар легі толастар емес. Солардың бірі кеше елорданың "Конгрес холл" кешенінде, Оңтүстік Қазақстан облысы әкімшілігінің ұйымдастыруымен өткен аймақ қолөнершілерінің көрмесі болды. Сондай-ақ өңір өнерпаздары бас шаһар тұрғындарына естен кетпес концерт сыйлап, Астанадағы жерлестерін бір қуантты деп хабарлайды NUR.KZ.

"Конгресс холға" жиналған жұрттың қарасы қалың болды. Олардың денін шаһардағы шымкенттіктер құрады.

Қала тұрғындары әсіресе өңір қолөнершілерінің қылқаламынан туған мынадай теңдессіз суреттер мен фототуындыларға таң қалып жатты.

Сондай-ақ, олар көрме қонақтарының назарына аймақта "Рухани жаңғыру" бағдарламасы аясында түсірілген көркем, анимациялық және деректі фильмдер топтамасы ұсынылды.

Көзі қарақты көрермен сонымен бірге Оңтүстік Қазақстан облысынан шыққан ақын-жазушылар мен қаламгерлердің су жаңа кітаптарымен танысты.

Ал облыстық өлкетану музейі қорындағы ұлттық киімдер мен әшекей бұйымдар астаналықтарды тіптен таңғалдырды. Бір қызығы ақ күмістен құйылған білезіктер салпыншақ сырғалармен бірге, қыздың бұрымына көрік беретін мынадай шолпылар да болды.

Сонымен бірге астаналықтарға елбасының "100 жаңа есім" бағдарламасы бойынша жеңіске жеткен өңір азаматтары жайлы да ақпарат ұсынылды.

Көрме соңы естен кетпес концертке ұласты. Онда өңір өнерпаздары мың бұрала билеп, ұлттық аспаптардың сүйемелдеуімен дәстүрлі әндерді шырқады. Сонымен бірге облыс әншілері атақты сазгер Шәмші Қалдаяқовтың әндерін тамылжыта орындап, көпшіліктің ыстық ықыласына бөленді.

"Шыны керек жерлестерімізді көріп қуанып қалдық. Әсіресе бейнелеу өнері шеберлерінің суреттері көздің жауын алады. Әрине егер осындай шаралар көбірек ұйымдастырылып тұрса, міндетті түрде келіп тұрамыз", - дейді көрме қонақтары.

Айта кетейік, айтулы елбасының "Болашаққа бағдар: рухани жаңғыру" бағдарламалық мақаласы аясында Астана қаласының 20 жылдығына орай ұйымдастырылған.