Кәрім Мәсімовтың әкесімен қоштасу сәті Алматыда өтіп жатыр (фото)

Алматыда Кәрім Мәсімовтың әкесі, қоғам қайраткері Қажымқан Мәсімовті ақтық сапарға шығарып салу рәсімі өтіп жатыр. Белгілі тұлғамен қоштасуға көп адам жиналған деп хабарлайды KAZ.NUR.KZ.

Қоштасу рәсімі Ғылым ордасында өтіп жатыр. Марқұмның туған-туыстарының бәрі жиналған. Кәрім Мәсімов те сөзсіз осында.

Қажымқан Қасымұлымен қоштасуға көптеген қоғам және саяси қайраткелер келген. Олардың арасында Олжас Сүлейменов, Қайрат Келімбетов, Болат Әбілов, Ғани Қасымов, Арманжан Байтасов, Қалмұхамбет Қасымов, Серік Күдебаев бар.

Қоштасу рәсіміне Алматы әкімі Бауыржан Байбек те келген.

Қала әкімі Елбасы Нұрсұлтан Назарбаевтың және президент Қасым-Жомарт Тоқаевтың көңіл айту хаттарын оқып берді.

"Құрметті Кәрім Қажымқанұлы.

Ардақты әкеңіз Қажымқан Қасымұлының дүниеден өтуіне байланысты Сізге және барлық жақын туыстарыңызға ауыр қайғыларыңызға ортақтасып, көңіл айтамын. Берік болыңыздар. Ол кісі кәсіпкерлікпен айналысып, Отанымыздың өсіп-өркендеуіне шама-шарқынша үлесін қосқан. Есімі елге танымал абыройлы азамат еді. Өзіңіздей туған елі мен халқының игілігі жолында бар білімі мен тәжірибесін, қажыр-қайратын жұмсап, аянбай еңбек етіп жүрген қайраткер ұлды тәрбиелеп өсірген еңбегі өз алдына бөлек.

Марқұмның топырағы торқа, жаны жәннатта болсын", - деп жазды Қазақстан Республикасының Тұңғыш президенті Нұрсұлтан Назарбаев.

"Құрметті Кәрім Қажымқанұлы.

Ардақты әкеңіз Қажымқан Мәсімовтың дүниеден өтуіне байланысты ауыр қайғыңызға ортақтасып, көңіл айтамын.

Ол кісі халқымызға танымал тұлға болып, еліміздің көрнекті азаматы ретінде ұлағатты ұрпақ қалдырды. Сол шаңырақта өсір-өнген өзіңіз де бүгінде барша жұртқа белгілі мемлекеттік қайраткер болып қалыптастыңыз. Марқұмның топырағы торқа, жаны жәннатта болсын. Әулеттеріңіздің алдағы күндеріне амандық пен жақсылықтар тілеймін", - деп Қазақстан Республикасының президенті Қасым-Жомарт Тоқаев көңіл айту хатын жолдады.

Қорғаныс министрі Нұрлан Ермекбаев пен Владимир Божко көңіл айтып, марқұмды еске алды.

Қажымқан Мәсімовтің "Кеңсайда" жерленетіні белгілі болды.

Еске сала кетейік, Қажымқан Мәсімов 80 жасында қайтыс болды. Ол 1939 жылы 18 сәуірде дүниеге келген.

Ол Омбы темір жол, Павлодардағы индустриалдық және Алматыдағы дене шынықтыру білім ордаларының түлегі болып табылады.

Еңбек және әлеуметтік қатынастар академиясындағы спорттық медицина кафедрасының құрметті профессоры.

2016 жылдың қарашасында Қажымқан Мәсімов "Қазақстанның ұлттық агроөнеркәсіп палатасының" президенті болып тағайындалды.

Сондай-ақ "Мәсімов сауықтыру орталығы" ЖШС директоры және Қазақстан йога ассоциациясының президенті қызметін атқарды.