Тегін лимузин, ақысыз батут: Ақтөбеде Құрбан айт мешітте ерекше тойланды (фото)

Ақтөбе қалалық орталық мешітінде қасиетті Құрбан айт мерекесі ауқымды түрде аталып өтті. Бүгін қалалық мешітте 2500 адам айт намазына сапқа тұрды. Айт намазынан кейін мешіт ауласында ойын-сауық басталды деп хабарлайды өңірдегі KAZ.NUR.KZ тілшісі.

Көпбалалы аналардың балалары лимузинге отырып, қаланың көрікті жерлерін аралады.

"Мұсылмандар мерекесін сезіндіру мақсатында халыққа, келген жамағатқа арналып, мешіт ауласына киіз үй тігілді. Ақсақалдар, орта буынды ағаларымыз мереке дастарханына шақырылды.

Әйелдер, жас бала, бүлдіршіндерге арналған мешіттің оң қапталына аттракциондар қойылды.

Батуттар, тәтті шырындар барлығы тегін. Құрбан айттың үлкен мереке екенін кішкентай балалар да сезініп, көруі керек.

Осы шараның бәрі мешіттің жанашыр кәсіпкерлерінің қолдауымен ұйымдастырылды",-дейді қалалық мешіт имамы Амантай Сәдиев.

Қалалық орталық мешітте жылдағы дәстүр бойынша мектепке жол акциясы да бүгін өткізілді.

Айт намазынан кейін қала әкімі мен қала имамы жүз балаға оқу-құралдарын таратты.

"Барша мұсылман қауымы үшін ең ұлық Құрбан айт мерекесі құтты болсын! 

Бұл күні отбасы мен туған-туысты, жақындарымызды құттықтап, бәріне жылы сөйлеп, көңілін көтеру, елді бірлікке шақыратын амалдар жасаған игі іс болмақ.

Ал, мемлекеттің мықты болуы елдің ынтымағына байланысты", - деді қала әкімі Мавр Абдуллин.

Мерекеде мешіттің сол жағында ер азаматтар спорттық ойындарға шақырылды. Гір көтеру, арқан тартыс, қол күреске бәйге тігілді.

Жеңімпаздар қаржылай сыйлықпен марапатталды.