"Допинг сияқты": Күнде жүгіріп, шынықпаса есінен танып қалатын атай көпті тамсандарды

Елімізде тәні қартайса да, жаны қартаймайтын қазыналы қарттар аз емес. Солардың бірі 64 жастағы Тілеужан Қанапиянов. Тұрғын марафондарға қатысып, 42 шақырымға жүгіреді деп жазады КТК арнасының "Астарлы ақиқат" бағдарламасына сілтеме жасаған KAZ.NUR.KZ.

Тілеужан Қанапиянов қарттар күніне орай шығарылған танымал бағдарламаның қонағы болды.

Ер адам жүгіруді 1964 жылдары, сегіз жасында бастаған. Ол кезде 5 шақырым қашықтықты бағындырып жүріпті. Кейіннен ірі қашықтықтағы марафондарға қатыса бастаған. Дегенмен, ол қанша жарысқа қатысса да, алғашқы жүгірген сәті есінен кетпейді екен.

"Марафон дегенді түсінбейтінмін, не ол деп. Бірінші рет марафонға қатыстым. 42 шақырымға жүгіру - 10 шақырым сияқты оңай болатын шығар деп ойлағанмын. 28-30 шақырымға келгенде шаршап қалдым. Есім танып, құлап қалдым. Марафон деген ойыншық емес екен", - деп еске алды қария.

Алайда алғашқы жарыста есін жоғалтса, қарт кісі еңсесін түсірмепті. Тіпті, арнайы жаттыға бастаған. Қария осыған дейін 41 шақырымдық марафонға 71 рет қатысқан.

Осылайша елдегі жарыстардан қалмай қатысатын Тілеужан атаның қоржынына 200-ден аса медальдары мен марапаттары жиналған.

Тілеужан Қанапияновтың айтуынша, ол күнде жүгіріп жаттығып тұрмаса, басы айналып, есінен танып қалады екен.

"Мен Водник жақта тұрамын. Сол жерден Алғабастағы Ақын Сара көшесіне дейін 10 шақырым. Соған жаңбыр болсын, қар болсын, күнде жүгіремін. Қалай деп айтсам екен, Құдай кешірсін енді айтқаныма, бұл бір допинг сияқты. Егер үш күн жүгірмесем басым айналып, есім танады", - дейді желаяқ қария.