Top.Mail.Ru

Сайт нұсқасы

ru kz

Зектілері

Атырау облысында жерленген ежелгі жауынгер табылды (фото)

Опубликовано:

Фото
Фото: Атырау облыстық коммуникациялар қызметі

Атырау облысында Миялы қорғанынан теңдесі жоқ темір сауытты жауынгер табылды деп хабарлайды KAZ.NUR.KZ порталы облыстық коммуникациялар қызметіне сілтеме жасап.

Ведомство мәліметінше, өңірдің тарихи өлкетану музейі мамандары Қызылқоға ауданындағы Миялы қорғандар тобынының үшінші қорғанына жасаған археологиялық қазба жұмыстары барысында қару-жарағымен жерленген жауынгерді тапқан.

Ал Атырау облысының әкімі Махамбет Досмұхамбетов аумаққа арнайы барып, жауынгердің сүйегін өз көзімен көргенін атап өтті.

Оның сөзінше, басынан аяғына дейін өте ерекше үлгідегі темір сауытпен жабдықталған адам қаңқасының ұзындығы - 175 см.

Ал табылған қабірдің ұзындығы – 2 м 40 см, ені - 80 см.

Сонымен қатар, мүрдемен бірге ұзындығы 1 метр болатын семсері, жебе ұштары мен қорамсағы, қалқаны, патера, ат әбзелдері және тағы да басқа көптеген жәдігерлер табылған.

Зерттеу жұмыстары халықаралық дәрежедегі қалпына келтіруші, "Қырым аралы" ғылыми-зерттеу орталығының басшысы Қырым Алтынбековтің басшылығымен жүргізіліп жатқаны белгілі болды.

Фото
Фото: Атырау облыстық коммуникациялар қызметі

Алтынбеков бұндай тарихи жәдігер өте сирек кездесетінін тілге тиек етті. Ол табылған сүйекті "темір адам" деп атауымызға да болады, дейді.

Өйткені ол басынан аяғына дейін темір сауытпен жабдықталған. Әрі ерекше үлгіде.

"Соған қарағанда, жауынгер болуы әбден мүмкін. Бізді таң қалдырғаны – темір сауыттың ұрланбай сақталғаны. Мұндай дүниелердің мыңдаған жылдар бойы сақталуы – өте сирек кездесетін жағдай. Қазақстанда дәл осы іспеттес тарихи құндылық әлі бірде-бір рет табылған жоқ", - деді "Қырым аралы" ғылыми-зерттеу орталығының басшысы.

Алтынбеков табылған тарихи құндылыққа жасалатын зерттеу жұмыстары әлі бірнеше жылға созылуы мүмкін екенін жасырған жоқ.

Өйткені рентген және металл іздегіш құрылғылардың көмегімен жүргізілген зерттеу нәтижесінде алтын, күміс, темір, сүйектен жасалған бұйымдардың бар екені анықталған екен.

Антропологиялық, ДНК-лық зерттеулердің қорытындысы бойынша алдағы уақытта мүрденің бас сүйегі мен сауытын қалпына келтіру жоспарланып отыр.

"Әлі тазалаймыз, жәдігерлердің әрқайсысына бөлек бөлек әдіс жасап, анализге дайындаймыз. Оған уақыт көп кетеді. Соның негізінде талай қазбалар шығуы ықтимал. Бұған дейін елімізде темір сауытпен адам шықпағандығын ескерсек, мүрде толықтай қалпына келтірілгенде, тек Атыраудың ғана емес, бүкіл Қазақстанның мақтанышы болары сөзсіз", - деп түсіндірді ол.

Мақаланың түпнұсқасы: https://kaz.nur.kz/society/1878737-atyrau-oblysynda-zerlengen-ezelgi-zauynger-tabyldy-foto/

pixel