Түркістан облысында 2 қарашадан бастап ұжымдық намаз оқуға рұқсат етілді

Түркістан облысында 2 қарашадан бастап ұжымдық намаз оқыла бастайды. Бұл туралы өңір әкімдігі ресми Facebook парақшасында хабарлады.

Әкімдіктің мәліметінше, таяуда премьер-министр Асқар Маминнің төрағалығымен ел аумағында коронавирус инфекциясының таралуына жол бермеу жөніндегі ведомствоаралық комиссияның (ВАК) селекторлық отырысы өткен болатын.

Онда мешіт жұмысына қатысты шешім қабылданған еді.

"Қабылданған шешім бойынша ағымдағы жылдың 2 қарашасынан бастап (жұма намазын қоспағанда) мешіттерде ұжымдық намаз (бес уақыт намаз) өткізуге рұқсат берілді. Алайда мешітте 100 адамнан артық кісі болмауы керек.

Сондай-ақ адамдар бетперделік режиммен 2 метр әлеуметтік арақашықтықты сақтаулары қажет. Қазақстан мұсылмандары діни басқармасы мешітке келуші жамағатты санитарлық-дезинфекциялық режимді қатаң сақтауға шақырады", - деп хабардар етті әкімдік.

Сонымен қатар Түркістан облысының бас имамы Мұсабек Ақтамберді карантин жағдайына байланысты әзірше жұма намазы оқылмайтынын хабарлады.

Бұдан өзге, мешіт қызметкерлері мен келушілер міндетті түрде бетпердемен жүруі тиіс.

Сондай-ақ әкімдік барлық мешіттердің намаз оқитын, құран оқитын бөлмелерінде антисептикалық құралдармен қамтамасыз етілетінін мәлім етті.

Ведомство мешітке жеке құлшылыққа келген азаматтардың мешітте ұзақ уақыт болмауы керектігін, сонымен бірге мешіт дәретханалары карантин режимі аяқталғанша жабық тұратынын ескертті.

Еске сала кетейік, бұған дейін Талдықорғанда Болат Назарбаев қорының көмегімен жаңа мешіт бой көтергенін жазған едік.

Мәтіннен қате тапсаңыз, бізге жазыңыз