"Келінімді емдеткім келді": Марқұм Сымбат Құлжағарованың қайын атасы өз шындығын айтты

Жақында Нұр-Сұлтан қаласында тұрғын үйдің жоғарғы қабатынан секіріп мерт болған Сымбат Құлжағарованың әкесі мемлекет басшысы Қасым-Жомарт Тоқаевтан көмек сұраған болатын. Ақтау қаласының тұрғыны Боранғали Құлжағаров президентке, бас прокуратураға, жоғарғы сот төрағасы мен және ішкі істер министрлігіне видеоүндеу жолдады. Ол қызының қайтыс болуына оның күйеуі тікелей кінәлі деп есептейді. Ал кеше марқұмның қайын атасы БАҚ өкіліне хабарласып, Сымбаттың өліміне қатысты кейбір мән-жайды айтып берген деп жазады Azattyq Rýhy.

Марқұм Сымбат Құлжағарованың қайын атасымын деген азаматтың есімі Тілеген Нұрекенов.

Ол үлкен ұлы Абай мен келіні Сымбаттың бес жыл отасқанын және ерлі-зайыптылардан екі баланың өмірге келгенін жеткізген.

Ер адамның пайымдауынша, туыстары көз жұмған келіншектің аурудан дер кезінде сауығып кетпеуіне ықпал етпеген. Құдалардың өзара түсініспеуі кесірінен созылмалы ауру дендеп, Сымбаттың өмірден мезгілсіз кетуіне түрткі болды, дейді Нұрекенов.

"Менің айтарым, бұл мәселеге түк қатысы жоқ бөгде адамдар араласып, басқалар үлкен шоу жасады. Марқұмның денсаулығына қарауға мұрша бермеді. Әкесі – менің құдам "еш ауру жоқ" деді. Мен ауру бар деп ешкімді айыптаған жоқпын. Қазіргі заманда бәріміз аурумыз. Бірақ қызды науқасынан емдетейік дедім. "Сен қайдағыны шығарып жүрсің" деп мүмкіндік бермеді.

Енді бұл мәселеге не айтамын? Келін өмірден өтті, алайда оны тірі кезінде емдетуге шамамыз келмеді. Мен ақталудан да, өзгелермен жарыса бірдеңе жариялаудан да әуел бастан бас тартқанмын. Неге десеңіз, менің ойымда тек бірнәрсе ғана тұрды. Ол – келінімді емдету болатын.

Бұрын да бірге отырып сөйлессек, кездессек деп құдама бірнеше рет ұсыныс жасадым. Алдында бір сөйлескенімізде, қызды емшіге апарамын, алдында қолыма жара шықты, соған апардым деді. Сол емшіге Сымбатты да апарамын деді. Бірақ мен ол емшіге сүйреп уақытты өткізбей, басқа жолын іздейік деумен болдым. "Жоқ, өзіміз емдейміз" деп, үйінде бір ай ұстады", - дейді марқұмның қайын атасы.

Нұрекенов отбасы шырқының бұзылып, құдалардың арасында түсініспеушіліктің болуына үшінші бір адамдардың әсері болғанын жасырған жоқ. Ол ерлі-зайыптылар арасына "ақылшылар" мен "азғырушылар" түсті деген пікірде. Одан кейін Сымбаттың мінезі өзгеріп кетті, дейді ол. Емделемін деп жүрген қызды ата-анасы алып кеткен.

"Жастардың арасындағы өзара әңгімеге біз араласқан жоқпыз, олардың арасындағы қарым-қатынас турасынан бейхабар болдық. Біз кейін ауырғанын білген соң, емдетейік деумен ғана болдық. Мұндай ауру түрі көп екенін және оның емделетінін елден естідік.

Бұлардың қателігі: олар жау іздеді, ал біз ем іздедік.

Көз жұмардан үш ай бұрын алып кетті, оның анасы, яғни менің әйелім де шырылдап отырды. Оны жеке тастап кетуге болмайды, қасына адам керек деді. Бұл жерде ортада арандатушылар да болды.

Қыздың анасының Тамара есімді сіңлісі бар. Оның жанына Сымбаттың өмірден өтіп кеткені батып жүрген жоқ. Ол Абайды (Сымбат Құлжағарованың күйеуі – ред.) қорқытып, ойына келгенін істетіп жүр. Қазір екі немереміз де сол Тамараның қолында. Негізі, олар әкесімен бірге болуы керек. Біз заңгерлермен кеңесіп, бұның заңдық жағын қарастырамыз", - дейді марқұмның қайын атасы.

Нұрекеновтің айтуынша, жастардың жанжалдасуына балгер себеп болған. Ол Сымбатқа "күйеуің көзіңе шөп салып жүр" деген көрінеді.

"Осы күнге дейін ұлым келінді ұрады дегенді ешкімнен естімегенмін. Той жасаған соң 6 күннен кейін еншісін беріп жібердім. Арасында жағдайларын сұрап тұрдым, бәрі жақсы дейтін. Құда-құдағи да шағым айтқан емес. Кейін құдағидан естідім, астанада бір Талғат деген емшіге барыпты. Сымбатқа "күйеуіңнің өзге әйелі бар, аяғы ауыр" деген екен. Жанжал содан басталған. Екеуінің арасына осылайша бөтен адамдар түсті. Біреулер келінге көз өткен дейді, оны жоққа шығармаймын, бірақ мәселе басқада", - дейді ол.

Сымбат суицид жасамастан бұрын күйеуімен татуласқан екен. Екеуі келіп, үлкендерден кешірім де сұрапты. Ал келінінің мұндай қадамға баруына психикалық ауру себеп болуы көбірек ықтимал дейді қайын атасы. Сондықтан оны емдетейік деп бірнеше рет айтыпты.

"Қыз ауырды. Мен келінімнің психикалық науқас екенін, содан зардап шеккенін айта аламын. Ол бір емес, үш рет өзіне қол салуға оқталды.

Жедел жәрдем шақырған соң, жарақаттарын таңғаннан кейін дәрігерлер бұл кісі "біздің клиентіміз емес" дегенді айтқан еді. Яғни, психдиспансерге орналастыру керек деген болатын.

Сымбат көз жұмған соң, бардық. Тіпті жерлеуді де біздің әулет атынан ұйымдастырайық, қазақтың дәстүрі бойынша келіннің шаңырағы біздің үй дедік. Құда араласпа деген соң қойдық. Біз барғанда олар айғай-шу шығарып, бізге қол жұмсап, итеріп шығарып тастады. Бірақ жетісін біз де өткіздік. Ағайын, туыс, дос-жаран келіп, көңіл айтып, құран бағыштадық", - дейді Нұрекенов.

Сөз соңында ол құдаларын сабырға шақыру үшін арнайы барып, сөйлесуге талпынғанын тілге тиек етті. Алайда, құдасы Боранғали Құлжағаров оны тыңдағысы келмепті.

"Мынау құда қарабет, аманатқа қиянат жасады деп қабылдамады. Мен өз тарапымнан келінімді жоғалтқанымды, баламның жұбайының және немелерімнің анасын жоғалтқаныма қайғырамын",- дейді марқұмның қайын атасы.

Еске сала кетсек, 29 жастағы Сымбат Құлжағарова 10 желтоқсан күні елордадағы көпқабатты үйлердің бірінен секіріп қайтыс болған еді.

Оның күйеуінен ажырасқысы келсе де, күйеуі некесін бұзудан бас тартып, оны ұрып-соғып, жындыханаға жатқызып, балаларын көрсетпеймін деп қорқытқаны айтылды.

Алайда марқұмның күйеуі Абай Әбдіғаниев жұбайына қол көтермегін айтып, мұны жала деп атады. Ер адам мен анасының айтуынша, Сымбаттың психикалық ауытқуы болған.

Олардың сөзінше, Сымбат осыған дейін де үш рет суицид жасамақ болыпты.