Қала іші жарқырай түскен: Алматы Жаңа жылға қалай дайындалды

Алматы көшелері жаңа жылға қалай безендірілді? Бұл сұраққа жауап беру үшін Sputnik Қазақстан тілшісі Алматы көшелерін аралап, тұрғындардың жаңажылдық көңіл-күйін фотоға түсірді.

Биыл Алматы қаласы Жаңа жылға орай безендірілмейтіні хабарланған еді. Қала әкімшілігінің хабарлауынша, коронавирус инфекциясының таралуын болдырмау үшін әкімдік бюджетінің негізгі бөлігі пандемиямен күресуге бағытталған.

Сол себепті, Жаңа жылға арналған кең ауқымды іс-шараларға, аудандарда жаңа жылдық шыршалар орнатуға және көшелерді жарықтандыруға ақша бөлінбеген.

Десе де, алматылықтар мүлде жаңажылдық шыршасыз қалмайды. Өткен жылғы шыршалар қалпына келтіріліп, 16 желтоқсаннан кейін қойылатын болды.

Алайда қала тұрғындары бұл жолы жаңажылдық отшашуды көрмейді.

Кәсіпкерлік нысандар мен мейрамханалар, сауда ойын-сауық орталықтары жыл сайын дәстүрге айналған безендіру жұмыстарын жүргізді.

Шыршалар орнатылып, қала халқы мен қонақтарына мерекелік шаттық сыйлауда. Бүгінде қаланың ішінде төрт шырша орнатылды. Шырша маңында фотоға түсіп жатқандардың да қарасы қалың.

Алматыда ауа райы салқын болғанына қарамастан қала тұрғындары сиыр жылын қарсы алуға дайындалып жүр.

Жаңа жыл жақындаған сайын қала іші жарқырай түсуде.

Еске салсақ, бұған дейін дәрігер жаңажылдық дастарқанның басты бес ережесін атағанын жазған едік.

Одан бөлек, Қазақстанда отшашулар мен петарда қолданғаны үшін қандай айыппұл салынатынын жазған болатынбыз.