RU

Атырауда жалақы ала алмай жүрген 30-дан астам қызметкер компания кеңсесінің алдына жиналды

Фото
Фото: Ақ Жайық

Бүгін, 18 қаңтарда "Gruppo RF Kazakhstan" компаниясының 30-дан астам қызметкері Қарабатанға барып, сол жерде митинг өткізу үшін кеңсе алдына жиналды деп хабарлайды Ақ Жайық басылымы.

Жиналған жұрттың алдына менеджерлер - Стефано Антими мен Светлана Муратова шығып, жағдайды түсіндірді.

Менеджерлердің сөзінше, олар "Базис-А-дан" 20 миллион теңге көлемінде аванстық төлем алған, бірақ бұл ақша олардың жалақысын төлеуге жетпейді.

"Бізде ақша жоқ, сондықтан біз жұмысшыларды жалақысыз еңбек демалысына жіберуге мәжбүр болдық. Қазір біз Италиядағы құрылтайшыдан ақша күтіп отырмыз. Біз ешкімді алдаған жоқпыз, қалған жұмысшылар сияқты біз де негізгі құрылтайшыдан ақша күтіп отырмыз", - дейді Антими мен Муратова.

Сонымен қатар кеңсеге Атырау облысы бойынша мемлекеттік еңбек инспекциясы, "Базис-А" ЖШС өкілдері, облыстық әкімшіліктің ішкі саясат бөлімінің қызметкерлері, полиция өкілдері келген.

"Біз "Gruppo RF Kazakhstan" ЖШС-ны тексеруді бастадық. Алдын ала мәліметтер бойынша, компания қызметкерлеріне 20 миллион теңгедей қарыз. Біз қазір анықтап жатырмыз. 9 желтоқсанда 48 жастағы жұмысшыны құбырлар қысып қалған өндірістік апат туралы айтатын болсақ, жұмыс беруші бізге осы оқиға туралы хабарлады. Біз осы мәселемен айналысып, жұмыс берушінің кінәсі бар деген қорытынды жасадық. Материалдар Атырау облысының полиция департаментіне жолданды", - деді Атырау облысы бойынша мемлекеттік еңбек инспекциясы басқармасы бастығының орынбасары Думан Абиев.

Дегенмен, жұмысшылардың жалақысын қашан алатындығын ешкім нақты айта алмады. Оларға тек осы еңбек жанжалын шешу үшін жұмыс комиссиясы құрылатыны туралы хабарланды.

Мақаланың түпнұсқасы: https://kaz.nur.kz/society/1894390-atyrauda-zalaky-ala-almaj-zrgen-30-dan-astam-kyzmetker-kompania-kesesini-aldyna-zinaldy/