Атырау-Доссор тас жолында екі полицей есірткімен ұсталды

Әлеуметтік желілерде Атырау облысында тәртіп сақшылары есірткімен ұсталды деген ақпарат пайда болды. Облыстық полиция департаментінің баспасөз қызметі аталған хабарламаға түсініктеме берді деп жазады KAZ.NUR.KZ.

Тұтқындалған сәттің видеосы Yedilov Online Telegram-арнасында жарияланды.

"Атырау облысы полиция департаменті әкімшілік полиция басқармасының техникалық қадағалау бөлімінің қызметкерлері есірткі заттарымен ұсталды", - делінген хабарламада.

Сонымен қатар, екі күдіктінің аты-жөні де көрсетілген.

Желіде кеңінен тараған ақпаратқа қатысты облыстың полиция департаментінің баспасөз қызметі пікір білдірді.

"Аталған факті бойынша ҚР Қылмыстық кодексінің 297-бабының 3-бөлігі (есірткі құралдарын, психотроптық заттарды, сол тектестерді өткізу мақсатында заңсыз дайындау, қайта өңдеу, сатып алу, сақтау, тасымалдау, жөнелту немесе өткізу) бойынша сотқа дейінгі тергеу жүргізілуде", - делінген хабарламада.

Атырау облысы полиция департаменті өзіндік қауіпсіздік басқармасының бастығы Мерген Төлемісов брифинг барысында құқық қорғау органдарының қызметкерлері ұсталғанын растады.

"2021 жылы 14 ақпанда Ішкі қауіпсіздік дирекциясы қызметкерлері жедел-іздестіру іс-шараларын өткізді, оның барысында Атырау-Доссор тасжолында Атырау облысы полиция департаментінің екі қызметкері тыйым салынған заттармен заңсыз жұмыс істегені үшін ұсталды", - деді полиция полковнигі.

Қазіргі уақытта тергеу жұмыстары жүргізіліп жатыр. Басқа ақпараттар тергеу мүдделері үшін жария етілмеді.

Мақаланың түпнұсқасы: https://kaz.nur.kz/society/1899084-atyrau-dossor-taszolynda-policiya-qyzmetkerleri-esirtkimen-ustaldy/