RU

Дубай ханшайымы тұтқында отырғанын мәлімдеді (видео)

Дубай ханшайымы
Фото: spletnik.ru

Дубай ханшайымы Латифа бинт Мохаммед Аль Мактум виллада тұтқында отырғанын айтып, жасырын видео түсірді. Үйдің терезесі жабық, оның медициналық көмек алуға мүмкіндігі жоқ деп хабарлайды CNN.

Латифа бинт Мохаммед Аль Мактум - БАӘ премьер-министрі, шейх Мохаммед ибн Рашид Аль Мактумның қызы.

Ол ең алғаш рет 2018 жылдың наурыз айында Үндістан жағалауындағы яхтада бой көрсеткен. Кейіннен ханшайымға жақын адамдардың дерегінше, оны Дубайға қайтарып алған.

Бұл шетелге қашып кетуді жоспарлаған Латифа үшін сәтсіз аяқталған екінші операция. Ол бұған дейін яғни 2002 жылы жасөспірім кезінде Біріккен Араб Әмірлігін тастап кетпек болған еді.

Латифа видеода ваннада құрбысы сыйлаған ұялы телефонмен жасырынып отырғанын айтады. Ол жазбасында вилланың жағалау маңында тұрғанын, терезе мен есіктер жабық екенін, өзін күзет бақылайтынын, сондықтан тек өз бөлмесінен асүйге ғана бара алатындығын айтқан.

Айта кетейік, Латифа Мохаммед бин Рашид аль-Мактумның жанұясынан қашпақ болған бірінші адам емес. Оның бұрынғы әйелі иорданиялық ханшайым - Хайя бинт аль-Хусейн 2019 жылы Дубайдан Лондонға екі баласымен бірге қашып кеткен еді.

Ол - шейхтің алтыншы әйелі болған, бірақ Латифаның анасы емес. Көп ұзамай ханшайым балаларын өз қамқорлығына алу үшін Лондонның Жоғары сотына арызданған.

Шейхтің басқа әйелінен туған қызы Шейха Шамса да 2000 жылы жазда Ұлыбританияға барған уақытта өз жанұясынан қашып кеткен. Кейін оны әкесіне жұмыс істейтін азаматар Кембриджде ұстап, шейхқа тиесілі аймаққа апарған. Кейіннен оны тікұшақпен Франциядағы Довильге, артынша Дубайға жеткізген.

Мақаланың түпнұсқасы: https://kaz.nur.kz/society/1899407-dubai-xansaiymy-tutqynda-otyrganyn-malimdedi-video/