Қар аралас жаңбыр, тұман, жел: Синоптиктер бүгінгі ауа райына болжам жасады

Бүгін, 18 сәуірде еліміздің басым аумағында ауа райы құбылмалы болады. Кей жерлерде жаңбыр, түнгі уақытта солтүстікте қар аралас жаңбыр болжануда. Кейбір облыстарда тұман түсіп, жел күшейеді, оңтүстік-шығыста, батыста және солтүстік-батыста найзағай ойнайды деп хабарлайды Қазгидромет.

Өңірлердегі ауа райы

Ақмола облысының кей жерлерінде тұман түсіп, таңертең және күндіз желдің жылдамдығы секундына 15-20 метрге дейін барады.

Жамбыл облысында, күндіз Алматы облысында найзағай ойнайды, жел 15-20 м/c дейін күшейеді.

Қостанай облысының кей бөліктерінде найзағай ойнап, дауыл тұрып, тұман түседі деп күтілуде. Күндіз желдің жылдамдығы 15-20, екпіні секундына 25 метрге дейін барады.

Солтүстік Қазақстан облысында кей жерлерді тұман басып, күндіз желдің екпіні 23-28 м/c дейін жетеді.

Шығыс Қазақстан, күндіз Павлодар, Қарағанды, Қызылорда облыстарында жел 15-20 м/c дейін күшейеді, Қарағанды облысында кей жерлерде – тұман.

Маңғыстау, Батыс Қазақстан облыстарында, түнде және таңертең Атырау облысының кей аймақтарын тұман басады. Батыс Қазақстан облысында найзағай жарқылдайды деп болжанды.

Мегаполистерде ауа райы қандай болады

Нұр-Сұлтанда 18 сәуірде күн ашық, жауын-шашынсыз. Ауа температурасы күндіз 18 градусқа дейін көтеріледі, түнде – плюс бір градус. Жел жоқ.

Алматыда көшпелі бұлт шығып, оқта-текте жаңбыр жауады. Күндіз сынап бағанасы плюс 19 градус, түнде плюс 8 градусты көрсетеді.

Шымкентте де күн ашық. Күндіз – плюс 22, түнде – плюс 11 градус.

Мәтіннен қате тапсаңыз, бізге жазыңыз