Қызылордада құрттың ішіне есірткі салып кіргізбек болғандар ұсталып қалды

Қызылордада түзеу мекемесіне келген сәлемдемеден, қолдан жасалған құрт ішінен есірткі шықты деп хабарлайды ҚазАқпарат.

Бұл жайт Қызылорда облысы бойынша қылмыстық атқару жүйесі департаментіне қарасты ЗК-169/5 мекемесінде болған.

Қылмыстық кодекстің 297-бабы 3-бөлігімен жазасын өтеп жатқан В. есімді азаматқа жолданған сәлем-сауқаттың ішінен есірткі тектес зат анықталды. Алты дана құрттың ішінен дәкеге оралып салынған өзіне тән хош иісі бар шөп тәркіленген.

"Мекемеге Қызылорда қалалық полиция басқармасының жедел-тергеу тобы шақыртылды. Тәркіленген зат бойынша сот сараптама жұмыстарының нәтижесінде ол салмағы 3,2 грамм кептірілген марихуана болып шықты. Аталған дерек бойынша Қылмыстық кодекстің 297-бабының 3-бөлігімен сотқа дейінгі тергеп-тексеру жұмыстары жүргізілуде", - деп мәлім етті Қызылорда облысы бойынша Қылмыстық-атқару жүйесі департаментінен.

Еске сала кетсек, бұған дейін Батыс Қазақстан облысында жеке кәсіпкердің жүргізушісі 8 телефонды түрмеге алып өтіп, сатпақ болғаны туралы жазған едік.

Сонымен бірге, Шымкентте түрмеге телефон жібермек болған ер адамның әрекеті видеоға түсіп қалған болатын.

Одан бөлек, Қостанай облысында тік ішегіне салмағы 4 грамм болатын "гашиш" түйіншегін салып, тергеу изоляторына кірмек болған сотталушы ұсталған еді.