RU

Үндістанда вакцина жетпей жатыр

Вакцина салдыруға келгендер кезегі
Фото: David Talukdar/NurPhoto via Getty Images

Үндістанның денсаулық сақтау министрлігінің хабарлауынша, соңғы тәулікте елде 401 993 жаңа инфекция анықталды деп хабарлайды ҚазАқпарат.

Елде коронавирустан көз жұмғандар саны соңғы 24 сағат ішінде 3,5 мыңға артып, 211,8 мың адамға жетті.

Үндістанда он күн қатарынан тәулік сайын 300 мыңнан астам жағдай тіркелуде. Бүгінге дейін Үндістанда тек дәрігерлер мен 45 жастан асқан адамдар ғана коронавирус вакцинасын алып келді. 1 мамырдан бастап елде 18-45 жас аралығындағы халықты вакциналау басталуы керек, бірақ бірқатар штаттар билігі вакцинаны жеткіліксіз деп ескертті. Делидің бас министрі Арвинд Кеджривал адамдардан вакцинаға кезекте тұрмауларын сұрады, өйткені Үндістан астанасы әлі қажетті дәрі-дәрмектерді алған жоқ.

"Алдағы бірнеше күнде вакцина орталықтарына келмеулеріңізді сұраймыз. Бүкіл елде көптеген адамдар вакцинаға жазылды, бірақ біз вакцина алған жоқпыз. Біз компаниялармен үнемі байланыста боламыз және дәрі-дәрмектерді бір-екі күнде аламыз деп үміттенеміз", – деді Делидің бас министрі.

Еске салсақ, Үндістан коронавирус жұқтырғандар саны бойынша әлемдік рекорд орнатып, елдегі жағдай қиындады. Бірқатар ел Үндістанмен әуе қатынасын тоқтаты. Сондай-ақ, Аустралия азаматтарына Үндістанға баруға тыйым салып, егер барса 5 жылға дейін сотталуы мүмкін екендігін ескертті.

Мақаланың түпнұсқасы: https://kaz.nur.kz/society/1910748-undistanda-vakcina-zetpei-zatyr/