Аймағамбетов Қазандағы қанды оқиғадан кейін басшыларға шұғыл тапсырма берді

Білім және ғылым министрі Асхат Аймағамбетов мектептерді дабыл түймесімен және бейнебақылау камераларымен жүз пайыз қамтамасыз етуді тапсырды деп хабарлайды Sputnik Қазақстан.

Бұл жөнінде Асхат Аймағамбетов министрліктің аппарат жиналысында сөз қозғаған.

"Ата-аналар балаларын балабақшаға не мектепке жібергенде алаңдамауы керек. Қауіпсіздік шараларын толығымен қабылдап, оқушыларға жайлы орта қалыптастыруымыз қажет. Ол үшін тиісті жұмысты ұйымдастыру керек. Қазан қаласында болған жантүршігерлік оқиға бәріміздің қабырғамызды қайыстырды. Бұл біз үшін үлкен сабақ болуға тиіс. Сондықтан біз білім саласында кешенді, жүйелі іс-шаралар қабылдауымыз керек", - деді ол.

Білім және ғылым министрі мектептердегі қауіпсіздік мәселесіне үлкен жауапкершілікпен қарауды бұйырды. Ол барлық білім ошағы "дабыл түймесімен" және бейнебақылау камераларымен қамтылуы керек екенін жеткізді.

"Барлығы дабыл түймесімен қамтамасыз етілуге тиіс. Бұған көп шығын шықпайды. Қаладағы мектептердің бейнебақылау камералары ішкі істер органдарының жедел басқару орталығына қосылуы керек. Картинаның сапасы, бейнекамералардың рұқсаты, деректерді сақтау мәселелері шешілуге тиіс. Білім және ішкі істер министрліктерінің бірлескен бұйрығы бар. Қазір біздің әріптестер басқа органдармен бірге қарастырып, камераны орнату, сапасы мен басқа да параметрлер бойынша ұсыныстарын беріп жатыр", - деді ведомство басшысы.

Асхат Аймағамбетов мектептерге мамандандырылған күзет тарту да өте маңызды екенін алға тартты.

Ол мектептің әрбір қызметкері мен оқушысы төтенше жағдай кезінде өзін қалай ұстау керектігін білуге тиіс екенін атап өтті.

"Бұл үшін оқу-жаттығу өткізу қажет. Біз қазір тиісті нұсқаулықтарға міндетті нормаларды енгізіп жатырмыз. Білім ұйымдарын аттестаттау кезінде оқу бағдарламасы, білім сапасына ғана емес, мектептің қаншалықты қауіпсіз екеніне де назар аударамыз", - деді министр.

Мектеп бітірген бала өз мектебіне қарумен бару деген ол, ең алдымен, тәрбие жұмысына қойылатын сұрақ. Ең алдымен, білім мазмұнына, білім бағдарламасына қойылатын сұрақ. Біз күзет, психолог, дабыл түймелері деп қана отырмай, тәрбие жұмысын да жандандыруымыз керек. Ең басты мәселе – құндылықтарға негізделген білім беру, деп түйіндеді сөзін Асхат Аймағамбетов.

Еске салсақ, өткен аптада Қазан қаласында мектепте атыс болды. Салдарынан тоғыз адам көз жұмып, он сегізі жараланды. Кейінірек анықталғандай, мектеп бітірген түлектердің бірі ғимаратқа қарумен кіріп, оқушыларға оқ жаудырған.