"29 градус аяз": Синоптиктер алдағы үш күнде ауа райы қандай болатынын болжады

"Қазгидромет" РМК 22-24 ақпанға арналған ауа райы болжамын ұсынды, деп хабарлайды KAZ.NUR.KZ тілшісі.

Синоптиктердің мәліметінше, алдағы үш күнде Қазақстанның оңтүстік жартысында жауын-шашынсыз ауа райы сақталады.

Дегенмен еліміздің солтүстік жартысында қар жауып, боран соғып, желдің күші 15-23 м/с дейін жетуі ықтимал.

Одан бөлек, республика бойынша тұман түсіп, көктайғақ болуы да мүмкін.

Сонымен қатар, еліміздің солтүстігі мен орталығында түнде 5-20 градусқа дейін, шығыста 10-29 градусқа дейін аяз күтіледі.

Ал оңтүстік өңірлерде түнде ауа температурасы -5 градус пен +5 градус аралығында құбылса, батыста 10 градусқа дейін аяз болуы ықтимал.

Еске сала кетсек, бұған дейін "Қазгидромет" РМК синоптиктері алдағы көктем мезгіліне арналған маусымдық ауа райы болжамын жариялаған болатын.