Қазақстан журналистер одағы мен "Әділ сөз" қоры мәлімдеме жасады

Қазақстан журналистер одағы мен "Әділ сөз" сөз бостандығын қорғау қоры маңызды мәлімдеме жасады. Оның мәтіні ҚР журналистер одағының ресми сайтында жарияланды.

"Ресей-Украина шиеленісі қазір бүкіл әлемде талқыланып жатыр. Ол Қазақстандағы әлеуметтік желіде де қатты белсенділік туғызды. Азаматтар, бірінші кезекте журналистер Конституциямызда кепілдік берілген сөз бостандығын толық көлемде пайдаланып, ойларын еркін жеткізіп жатыр. Бірақ көбі өз пайымдарын қорғау кезінде қан қызуымен шектен асып кетуде. Ал ондай шек біткен жерде жек көру тілі басталады

Естеріңізге саламыз: халықаралық стандарттар, атап айтқанда, ұлттық, нәсілдік немесе діни өшпенділікті насихаттауға тыйым салу жөніндегі Рабаттық іс-қимыл жоспары «жеккөрушілік» пен "дұшпандықты" мақсатты топқа қатысты айыптаудың, дұшпандықтың және наразылықтың терең және иррационалды сезімдердің көрінісі ретінде қарастырады. Яғни, сіз кез келген әрекетті немесе әрекетсіздікті жек көре аласыз, бірақ сіз азаматтығына, ұлтына, дініне байланысты, ұлтты, діни немесе басқа адамдар тобын жек көре алмайсыз.

Кімді болса да, әсіресе, бұқаралық ақпарат құралдарында және әлеуметтік желілерде ашық жек көру – қалай десек те, жанама бәлкім шамалы мөшерде болатын шығар, бәрі бір қарсы насихат. Осы сөзім арқылы адамдарды неге шақырып тұрмын? Мұның арты іс жүзінде неге әкелуі мүмкін? Өз пікіріңізді білдіре отырып, алдымен осы жағын ойлану керек.

Біз кез келген өткір мәселені сөзжарыс, пікірталас арқылы ашық талдауды қолдаймыз. Дәйектерге сүйенген, ешкімді қорламай, кемсітпей, қорқытып-үркітпей және агрессия танытпай дауласуды жөн деп білеміз. Қоғамдағы хаос – сөздегі хаостан, сөздегі хаос – бастағы хаостан басталады. Ондай тізбек кімге керек? Журналистер мен блогерлердің өз ұстанымдарын білдірген кезде сөзжарыс мәдениетін, қарсыласқа деген құрмет пен қоғам алдындағы жауапкершілікті есте сақтауы бұрын-соңды дәл мұндай маңызды болып көрген жоқ деп есептейміз", - делінген мәлімдемеде.