"Әскерге барып, он күн ішінде көз жұмды": Жамбыл облысында мерт болған сарбаздың жеңгесі өз шындығын айтты

Жамбыл облысы Қордай ауданындағы №30212 әскери бөліміне шақырту алған жас сарбаз Әлібек Қалбай мезгілсіз қаза тапты. 13 сәуір күні Маңғыстау облысына қарасты Ақшұқыр ауылынан әскери борышын өтеуге аттанған жауынгер бар болғаны он күн ішінде о дүниелік болған. 18 жастағы жігіттің жеңгесі KAZ.NUR.KZ тілшісіне сұхбат беріп, сарбаз өлімінде шикілік барын айтты.

Әлібек Қалбайдың қазасы туралы суық хабарды жақындары 22 сәуір күні естіді. Марқұмның жеңгесі Динара Тілесованың айтуынша, жас жігітті әскерге күштеп алып кеткен.

"Әлібек 2003 жылы туған. Мен оның туған жеңгесімін. Қақ-соқпен ісі жоқ, өзіне біреу тиіспесе, ешкімге күш көрсетпейтін жігіт еді. Қайсарлығы басым болатын. Оны әскерге жұмыс істеп жүрген жерінен алып кетті. Әскери бөлімдегілер 3 миллион теңге айыппұл салатынын, тіпті, қамап тастайтынын айтқан соң, Әлібек Отан алдындағы борышын өтеп келемін деп ұйғарды.

Біз оны бүкіл туысымызбен бірге шығарып салдық. Кейін әскерге барған соң анасымен байланысып, асқазаны ауырып тұрғанын айтқан және дәріге 4 мың теңге аударып жіберуін өтінеді. Міне, содан кейін біз оның қазасы туралы ауыр хабарды ғана естідік", - дейді Динара.

Әскери бөлімдегілер жас сарбаздың өліміне қатысты пікір білдірді. Олардың айтуынша, жауынгер сапта тұрған жерінен басы айналып, құлап қалған.

"22 сәуірде рота таңғы астан келгенде казарма алдында тұрған. Сол кезде Әлібек ең соңғы қатарда тұрған. Басы айналып, құлап түсті, артқа қарай. Алғашқы дәрігерлік көмек көрсетіп, бірден медсанбатқа алып кеттік. Басының неден айналғанын білмеймін мен, күніне 2-3 солдат басы айналып құлайды", - дейді Хабар24-ке сұхбат берген №30212 әскери бөлімінің командирі Алмас Доспаев.

Алайда марқұмның туыстары әскери бөлімнің бұл уәжімен келіспейді. Динара Тілесованың айтуынша, сарбаздың денесінен зорлық белгілері байқалған.

"Әлібектің денесін Ақтауға алып келді. Біз осы жақтағы сот-медицина сараптамасының қорытындысын күтіп отырмыз. Өзіміз көрдік, Әлібектің денесінде сау жері қалмаған, соққы іздері өте көп. Барлығын видеоға, суретке түсіріп алдық. Кейін мұның бәрін жарыққа шығаратын боламыз. Отан алдындағы борышын өтеу әрбір жігітке міндет. Бірақ ешкім әскерге өлім құшу үшін бармайды ғой?!

Артында аңырап ата-анасы мен бауырлары қалды. Бүкіл ауылдың қабырғасы қайысты. Баласының табытын құшақтап қалған ананы кім жұбатады? Басы айналып, құлап қалғанына сенбейміз. Заң бойынша сарбаздың өліміне кінәлілерді табуды талап етеміз", - дейді марқұмның жеңгесі.

Айта кетелік, қатардағы жауынгер Әлібек Қалбай 22 сәуір күні Гвардейск әскери қалашығындағы госпитальде көз жұмған еді.