Елімізде "Өзін-өзі тану" пәнін мектеп бағдарламасынан алып тастау жоспарлануда

Оқу-ағарту министрлігі "Өзін-өзі тану адамгершілік-рухани білім беру бағдарламасын" мектеп оқушылары үшін міндетті пәндер тізімінен алып тастау туралы бұйрық жобасын дайындады. Құжат "Ашық нормативтік құқықтық актілер" порталында жарияланды, деп хабарлайды KAZ.NUR.KZ.

Қоғамдық талқылауға арналған құжат бір күн бұрын, 21 қыркүйекте порталда жарияланды. Талқылау алдағы 5 қазанға дейін жалғасады.

Авторлар "Өзін-өзі тану адамгершілік-рухани білім беру бағдарламасын бекіту туралы" Қазақстан Республикасы Білім және ғылым министрінің 2018 жылғы 29 қыркүйектегі №522 бұйрығының күші жойылды деп тануды сұрайды.

Аталған бағдарлама қосымша білім беру мен оқудан тыс қызмет мазмұнының адамгершілік-рухани аспектісін күшейтуге бағытталған.

Естеріңізге сала кетейік, биылғы жылдың ақпан айында желіде "өзін-өзі тану" пәні оқуға міндетті пәндер тізімінен алынады деген ақпарат тараған еді.

Сол кезде БҒМ өкілдері "өзін-өзі тану" пәнін мектепте оқуға міндетті пәндер тізімнен факультативті санатқа ауыстыру мүмкіндігін қарастырып жатқанын айтқан болатын.

Мақаланың түпнұсқасы: https://kaz.nur.kz/society/1989185-elimizde-ozin-ozi-tanu-panin-mektep-bagdarlamasynan-alyp-tastau-zosparlanuda/