Еліміздегі кинотеатрларда әйгілі "Аватар" фильмі қазақ тілінде қайта көрсетіледі

Қазақстан кинотеатрларында әйгілі "Аватар" фильмі қайта көрсетіледі. Бұл жолы көрермендер фильмді қазақ тілінде тамашалай алады, деп хабарлады Мәдениет және спорт министрі Дәурен Абаев Facebook парақшасында.

"Достар, сіздермен керемет жаңалықты бөліскім келіп отыр. Осы жексенбіден бастап еліміздің кинотеатрларында кинематография тарихындағы ең жоғары кассалы және көрермендер тарапынан зор сүйіспеншілікке ие болған "Аватар" фильмі жаңартылған бейнеде, өңделген дыбыспен қазақ тілінде қалың көрерменге жол тартады.

Түпнұсқаны қайта шығарудағы мақсат – кейінгі онжылдықтың айтулы фильм болады деп күтіліп жатқан "Аватар: Су жолы" екінші бөлімінің шығуымен орайластырылып отыр. Оның да премьерасы ана тілімізде биыл 16 желтоқсанда болады", - дейді министр.

Дәурен Абаевтың сөзінше, еліміздің шығармашылық дубляж тобы фильм мәтінін қазақ тіліне аудару, оның локализациясы және дыбыстау бойынша сапалы жұмыс атқарған.

"Бұдан бөлек, Мәдениет және спорт министрлігі "Интервидео" компаниясымен бірлесіп әлемдік премьерасы алдағы 10 қарашада өтетін MARVEL әлемінің "Қара пантера: мәңгі Ваканда" фильмін де қазақ тіліне дубляждайтынын айта кеткім келеді.

Алдағы уақытта да осы бағыттағы жұмыстарды қарқынды жалғастырып, картиналардың қазақ тіліндегі прокатын көбейте беретін боламыз", - дейді Мәдениет және спорт министрі.