Қарағанды облысындағы шахтадағы төтенше жағдайға байланысты қылмыстық іс қозғалды

Қарағанды облысындағы Ленин атындағы шахтада болған төтенше жағдайға байланысты қылмыстық іс қозғалды. Бұл туралы KAZ.NUR.KZ өңірлік полиция департаментінің баспасөз қызметіне сілтеме жасап хабарлайды.

Ведомствоның мәліметінше, қылмыстық іс Қылмыстық кодекстің 277-бабы 3-бөлігіне сәйкес қозғалған.

"Оқиға орнында Қарағанды облыстық полиция департаментінің жедел-тергеу тобы жұмыс істеуде. Қазіргі уақытта қажетті барлық тергеу әрекеттері жүргізілуде", - делінген Қарағанды облысы ПД баспасөз хабарламасында.

Еске сала кетейік, Қарағанды облысы Шахтинск қаласындағы "АрселорМиттал Теміртау" АҚ-ға тиесілі шахтада сағат түнгі 3:00-де газды дренаж скважиналарын бұрғылау кезінде газдың шығуы орын алып, салдарынан 4 жұмысшы қайтыс болған еді.

Кен орнының тағы төрт жұмысшысы ауруханаға жеткізілген болатын.

ТЖМ тағы бір жұмысшыны іздеу жұмыстары жүргізіліп жатқанын хабарлады.