Мемлекеттік тілді білмейтіндерге Қазақстан азаматтығын бермейтін заң қабылданады

Опубликовано:

Әлихан Смайылов
Әлихан Смайылов. Фото: Үкіметтің Telegram арнасы

Ел заңнамасына мемлекеттік тілді білмейтіндерді азаматтыққа қабылдаудан бас тартуды көздейтін түзету әзірленді. Бұл туралы премьер-министр Әлихан Смайыловтың мәжіліс депутаттарының сауалына берген жауабында айтылған, деп хабарлайды ҚазАқпарат.

”Қазіргі уақытта ”Қазақстан Республикасының азаматтығы туралы“ Заңға мемлекеттік тілді, тарих пен ұлттық заңнаманың негіздерін білмеуді азаматтыққа қабылдаудан және қалпына келтіруден бас тарту үшін қосымша негіз ретінде көздейтін, сондай-ақ қос азаматтығы фактілерінің алдын алуға бағытталған түзетулер әзірленді”, - деп атап өтеді үкімет басшысы.

Премьер-министрдің айтуынша, аталған заңнамалық түзетулер парламент депутаттары бастама жасаған ”Қазақстан Республикасының кейбір заңнамалық актілеріне халықтың көші-қоны саласындағы заңнаманы жетілдіру мәселелері бойынша өзгерістер мен толықтырулар енгізу туралы“ заң жобасы бойынша парламент депутаттарының түзетулеріне, үкімет қорытындысының жобасына енгізілді.

Айта кетейік, мәжіліс депутаттарының сауалында қоныс аударушылардың қос азаматтығын тексеруге және құқықтық іс-шаралар қабылдауға қатысты мәселелер көтерілген болатын.

Мақаланың түпнұсқасы: https://kaz.nur.kz/society/1996117-memlekettik-tildi-bilmeitinderge-qazaqstan-azamattygyn-bermeitin-zan-qabyldanady/