"Орташа құрам және тәжірибесіз жастар": Қорғаныс министрі казинода ойнаған сарбаздар жайлы айтты

Қорғаныс министрі Руслан Жақсылықов сенат кулуарында ойынханада миллиондаған теңгеге ұтылған мемлекеттік қызметкерлер тізіміндегі әскерилер туралы айтты, деп хабарлайды KAZ.NUR.KZ.

Қорғаныс министрлігінің басшысы бірқатар әскери қызметкердің Алматы облысы бойынша қадағалау органының тізімдерінде бар екенін айтты.

"Қызметкерлер емес, әскерилер саны көп. Олардың әрқайсысына қызметтік тергеу тағайындалды. Тергеу қорытындысы бойынша мен одан әрі қызметті жалғастыру туралы шешім қабылдаймын. Бірақ алдымен тергеу жүргізейік", — деп жауап берді министр.

Ол құмар ойын орындарына барғандар туралы аты-жөні мен лауазымына дейін барлық ақпараттың бар екеніне сендірді.

"Қызметтік тергеу жүргізілуде. Бұл әскери қызметкерлердің орташа құрамы. Жоғары құрам жоқ. Білесіз бе, жоғары құрамның оған уақыты жоқ, өйткені біз үнемі далада, жұмыстамыз. Иә, бұл орташа құрам. Біздің әскерилер үшін аз адам. Бір қарағанда тәжірибесіз жастар", — деп түйіндеді министр.

Еске салайық, қазан айының ортасында прокурорлар бірқатар қазақстандық мемлекеттік қызметкердің ойын орындарына барғанын, шенеуніктердің ойын-сауыққа жұмсаған шығыны 500 миллион теңгеден астам болғанын анықтаған болатын.

Кейін Ұлттық экономика министрі Әлібек Қуантыров шенеуніктер ойынханаға ақшаны қайдан алады деген пікірімен бөлісті.

Бұл ретте жағдайға байланысты Бас прокуратура мен Мемлекеттік қызмет істері агенттігінде түсініктеме берілді. Аталған мәселе бойынша тексеру жұмыстары жүргізіліп жатқаны хабарланды. Бас прокуратура деректер расталса, мемлекеттік қызметкерлерге қатысты "ең қатаң шаралар" қолданылатынын айтты.