"Жаңа жылды өз шаңырағында қарсы алады": Түркістан облысында көпбалалы отбасына ауылдастары үй сыйлады

Түркістан облысы Бәйдібек ауданы Жамбыл ауылының тұрғындары көпбалалы ауылдасына үй алып берді, деп хабарлайды ҚазАқпарат.

Басылымның жазуынша, жерлестері бүгінге дейін 5 бала-шағасымен баспана жалдап күнелтіп келген Естебековтер отбасына баспана алып беруге ниеттенген.

Керек қаражатты жинағанымен, алайда межелеген сомаға жеткізе алмаған.

Бұл істен хабардар болған аудандық мәслихат хатшысы Асқар Кенехан азаматтық танытып, қажетті қаржының жартысын берген.

Осылайша, Естебековтер отбасы Жаңа жыл қарсаңында үйлі болған. Көп балалы отбасы игі іске ұйытқы болған жерлестеріне алғыс айтты.

Басылымның мәліметінше, бұл - Бәйдібек ауданында қайырымдылықпен беріліп жатқан 13 үй.

Жомарт жандар мұқтаж отбасыларға баспана сыйлап, азық-түлік алып беруге ұдайы қол ұшын созып келеді.