Астана оқушылары бүгін тағы қашықтан оқиды

Астанада қолайсыз ауа райы салдарынан 0-9 сынып оқушылары қашықтан оқу форматына өтеді, деп хабарлайды қаланың білім басқармасының ресми Instagram парақшасы.

Астана қаласы білім басқармасы хабарлауынша, 2023 жылдың 12 қаңтар күні ауа райының қолайсыздығына байланысты бірінші ауысымның 0-9 сынып оқушылары қашықтан оқыту форматына ауыстырылады.

Сонымен бірге Семей қаласындағы 1 ауысымда оқитын 1-9 сынып оқушылары, ал Ақтөбедегі 0-11 класс оқушылары онлайн форматқа ауыстырылды.

Қарағанды қаласы мен Ұлытау облысында да 0-11 (12) сынып оқушылары мен колледждердің I, II курс студенттері қашықтан білім беру режиміне көшеді.

Сол сияқты Оралда да бастауыш сынып оқушылары онлайн оқиды.

Бұған қоса ШҚО-ның Самар, Күршім, Тарбағатай, Зайсан аудандарында - 0-11 сынып оқушылары, Қатонқарағай ауданында - 0-9 сынып, ал Алтай ауданында 0-4 сынып оқушылары мектепке бармайды.

Бұдан бөлек алматылық оқушылар да бүгін онлайн форматта оқитын болады.

Сондай-ақ, бұған дейін бүгін еліміздің ірі қалаларында әлі де қатты аяз сақталатынын хабарлаған едік.

Мәтіннен қате тапсаңыз, бізге жазыңыз