Алматы әкімдігі тұрғындарды ғимарат шатырындағы мұз сүңгілерден абай болуға шақырды

Алматы әкімдігі шатырлардағы мұз сүңгілері жайлы ескертті, деп хабарлайды KAZ.NUR.KZ әкімдіктің баспасөз қызметіне сілтеме жасап.

Қала әкімдігінің хабарлауынша, Алматы бойынша көпқабатты үйлердің шатырларында мұз сүңгілерінің қатқаны байқалуда.

Осы орайда жергілікті әкімдік қала тұрғындарын мұз сүңгілерін байқаған жағдайда, уақтылы тазалау әрі жарақат алу қауіпінің алдын алу мақсатында, үйіңізге қызмет көрсететін мекемелерге (МИБ, ПИК және т.б.) хабарласуға шақырады.

"Қауіпсіздік мақсатында қар немесе мұз сүңгілерінің құлап түсу қаупі бар, балкон және басқа да нысандардың астында, шетінде тұрмауды ескертеміз. Сондай-ақ ескерту лентасымен белгіленген жерлерді айналып өткен жөн", - дейді әкімдік өкілдері.

Сонымен қатар ведомство өкілдері егер қызмет көрсету мекемелері өтінімдерге уақтылы жауап бермесе, онда "Алматы қаласының коммуналдық инфрақұрылымды дамыту басқармасы" КММ-не, +7 (727) 225-14-31 нөмірі бойынша хабарласуға кеңес берді.

Мәтіннен қате тапсаңыз, бізге жазыңыз