"Үйден сланцымен шығып кеткен": Семейде 30 жастағы ер адам бір айдан бері іздестірілуде (фото)

Семейде 1 айдан бері 30 жастағы Алтай Болатов есімді ер адам іздестірілуде, деп хабарлайды Telegram-дағы "ҚР ІІМ жаңалықтары" арнасы.

Белгілі болғандай, Алтай Болатов 2022 жылдың 27 желтоқсанында үйінен белгісіз бағытқа қарай шығып, сол күйі оралмаған.

Қазіргі таңда полиция қызметкерлері хабар-ошарсыз кеткен ер адамның орналасқан жерін анықтау бойынша жедел-іздестіру іс-шараларын өткізуде.

"Ер адамның психикалық ауытқуы болғандықтан, есін білмеуі мүмкін", - деп қосты полицейлер.

Құзырлы органның мәліметінше, Алтай Болатовты іздестіруге 30-ға жуық полиция қызметкері жұмылдырылған. Іздестіру жұмыстары Затон және Мирный аудандарында жүргізілуде.

Тәртіп сақшылары Алтай Болатовтың орналасқан жері туралы қандай да бір ақпарат білетін адамдар болса "102" арнасына хабарласуын сұрайды.

Ер адамның белгілері: арықтау келген, бойы 175 см, көзінің түсі қоңыр, шашы қара. Үйден шыққанда үстінде қара-көк түсті футболка, қара куртка, басында қара шапка, қара трико, аяғында үйге киетін сланцы болған.