Жеңілдетілген автонесие беру қашан қайта басталады: Марат Қарабаев жауап берді

Опубликовано:

Көліктер
Көрнекі фото: pixabay.com

Қаңтар айының соңына дейін жеңілдетілген автонесие бағдарламасы қайта іске қосылады. Бұл туралы үкімет кулуарында Индустрия және инфрақұрылымдық даму министрі Марат Қарабаев хабарлады, деп жазады ҚазАқпарат.

Министрдің сөзінше, бағдарламаның механизмі қайта қаралуы мүмкін.

"Өткен жылы наурызда автонесие сомасы 10 миллион теңгеге дейін деп белгіленді. Ал автокөлік құны 15 миллион теңгеден аспауы керек. Халыққа қолжетімді болу үшін бағдарламада қымбат көліктер қарастырылмаған.

Автонесие бағдарламасын айдың соңына дейін бастаймыз. Осы аптада өнеркәсіпті дамыту қоры баспасөз мәслихатын өткізеді, сонда толық ақпарат беріледі.

Бұл жерде бағдарламаның механизмін қайта қарау мәселесі тұр. Бұған дейін клиенттер алдымен автосалонға жүгініп, содан соң банкке баратын. Өнеркәсіпті дамыту қоры басқа тетікті ұсынып отыр", - дейді БАҚ өкілдерінің сауалына жауап берген Марат Қарабаев.

Ведомство басшысының айтуынша, қайта іске қосылатын бағдарламадағы жаңашылдықтың бірі электронды кезек болмақ.

Мақаланың түпнұсқасы: https://kaz.nur.kz/society/2006558-zenildetilgen-avtonesie-beru-qasan-qaita-bastalady-marat-qarabaev-zauap-berdi/