Алматы облысында ауыл тұрғындары қаңғыбас иттер үшін балаларын мектепке жіберуге қорқып отыр

Алматы облысы Көкөзек ауылының тұрғындары балаларын мектепке жіберуге қорқып отыр. Олардың сөзінше, ауылда адамнан гөрі қаңғыған ит көп, деп хабарлайды Almaty.tv.

Көкөзек ауылы тұрғындарының айтуынша, соңғы уақытта олар көшеде еркін жүріп-тұрудан қалған. Себебі, қаңғыған иесіз иттер ауылды кезіп жүр. Тұрғындар бәрінен бұрын балалары үшін қауіптенеді. Бірі мектепке апару үшін ақша төлеп көлік жалдаса, енді бірі өздері ертіп жүруге мәжбүр.

Ауыл тұрғыны Гүлбану Айдарбекова балаларын сабаққа жібергенде жанын шүберекке түйіп отыратынын айтады. Өйткені, оның төрт баласы да мектепте оқиды.

"Телефонмен сұрап отырамын. Телефоны жоқ балаларым да бар", – дейді көпбалалы ана.

Ал тағы бір тұрғын Айзел Тілеубекова ақылы түрде такси жалдап отыр.

"Иттен қорқып 2-сынып оқитын қызымды мектепке апарып, әкелу үшін көршіме 10 мың теңге беремін. Ауыл ішінде автобус жүрмейді. Айына 10 мың теңге беріп, такси жалдаймыз", – дейді ауыл тұрғыны.

Тұрғындардың айтуынша, бұралқы иттер мал мен жанға шабатынды шығарған. Осыдан 10 күн бұрын бір үйдің бір қора малын қырып кеткен көрінеді.

"Сегіз қойдың алтауын бауыздап, сан етінен жұлып, жеп кеткен. Біреуі ғана аман қалған. Шала жансар жатыр екен. Ал екі қой қашып, аяқтарын сындырып, аман қалған", – дейді Көкөзек ауылының тұрғыны Сәрсенбай Әміре.

Ауыл тұрғындары көше кезіп жүрген иттердің қайсы құтырған, қайсы иесі жоқ, қайсының қаңғып жүргенін болжап білу мүмкін емес дейді.

Елтай ауылдық округі әкімдігінің айтуынша, жыл басынан бері дәл осындай 56 итті аулаған. Десе де ауыл жұрты оның саны әлі де азаймай отырғанын айтады.

"Тұрғын келіп, шағым береді, хабарлама арқылы жіберуге болады. Сұраныс ретінде қабылдаймыз, сол сұраныс түскен күні ветеринарлар келеді. Аптасына екі рет келіп, жұмыс жүргізеді", – дейді Елтай ауылдық округінің әкімі Біржан Махатов.

Ауыл халқы әкімдікке шағымданғаннан пайда жоғын айтады. Тіпті ветеринарлардың ауыл аралап, ит аулап жүргенін де көрмегенін алға тартты. Олар жазатайым оқиғаның алдын алу үшін заңның күшейтілгенін қалайды.