Әлі күнге дейін шаңғы тебетін 88 жастағы қарағандылық қария ұзақ жасаудың сырын ашты (видео)

Аптасына 3 мәрте шаңғы тебетін 88 жастағы қарағандылық қария Әлімжан Телғарин ғұмырлы болудың негізгі құпиясы – салауатты өмір салтын ұстануда екендігін айтты, деп хабарлайды Хабар 24 арнасы.

Телеарнаның хабарлауынша, Е.Бөкетов атындағы Қарағанды университетінің профессоры, тарих ғылымының докторы Әлімжан Телғарин шаңғы мен коньки теуіп қана қоймайды, волейбол мен футбол ойнайды. Сондай-ақ ол негізгі ісі – ғылыми педагогиканы зерттеумен айналысады.

88 жастағы ақсақал шаңғыдан университет ішілік дәстүрлі жарыстың ең егде тартқан қатысушысы екен.

Осыған қарамастан ол аптасына 3 мәрте шаңғы теуіп, сағатына 5 шақырым қашықтықты оңай еңсереді. Ал ректор кубогы үшін болған жарыста ақсақал үздіктер қатарынан көрінген.

"Әлімжан ағамыз мен қызмет еткен 30 жылда бірде бір рет жарыстан қалған емес. Өз жасы арасында үнемі бірінші орын алады. Осы жастағы ақсақалдар шаңғы теппек түгілі есік алдына шығудан қорқады. Ал біздің ардақ тұтатын ағамыз аяғында шаңғы, қашан да ел алдында жүреді", – дейді Е.Бөкетов атындағы Қарағанды университетінің профессоры Айтбай Жұмағұлов.

Сонымен қатар Әлімжан ақсақал жүздеген ғылыми жұмыстың да авторы.

"Менің негізгі мамандығым – Чехославакия тарихы. Ол елде мен 1 жыл ғылыми тағлымдамадан өттім. Сол кезде 1965-66-шы жылдары аталған мемлекеттің спортакиадасына қатыстым. Содан бері шаңғы тебу, шахмат, волейбол ойнау менің сүйікті ісіме айналды. Осы аталған спорттың түрлерінен көрсеткен нәтижелерім қашанда жоғары болды", – дейді профессор.

Ол шахматтан ел бойынша бірнеше дүркін чемпион атанған. Интеллектуалды ойында ондаған стратегияны еркін пайдаланады. Сондықтан қарсылас шақ келтірмейді екен.