Полицейлер елорда тұрғынына пойызда ұмыт қалдырған 7 млн теңге салынған сөмкесін тауып берді

Астана тұрғыны құжаттары мен 7 млн теңгеге жуық ақша салынған сөмкесін пойызда ұмыт қалдырған. Көліктегі полиция сөмкені иесіне тауып берді, деп хабарлайды Polisia.kz ақпараттық медиа-порталына сілтеме жасаған KAZ.NUR.KZ.

3 ақпанда Ақмола облысындағы Есіл стансасының желілік полиция бөліміне 43 жастағы Астана тұрғыны ішінде 4 млн теңге және 6 мың доллар (шамамен 2,8 млн теңге) салынған сөмкесін табуға көмектесуін сұрап жүгінген.

Денис Чернецкий Алматы-Орал бағытындағы жолаушылар пойызымен Есіл станциясына достарына қонаққа келген. Ірі сома салынған сөмкесінің жоғалғанын ол үйіне жеткенде ғана білген. Ер адам бірден көліктегі полиция департаментіне жүгінген.

Жедел-іздестіру іс-шараларының нәтижесінде қызметкерлер жоғалған сөмкені ішіндегі заттарымен қоса тапты. Сөмке иесіне тапсырылды.

Елорда тұрғыны көліктегі полиция қызметкерлеріне жедел әрекет етіп, қызметтік міндетін адал атқарғаны үшін алғыс білдірді.

"Қызметкерлер менің өтінішіме жылдам жауап берді. Олар пойыз бастығына хабарласты, сөйтіп сөмкемнің қай жерде екені анықталды. Алты сағаттан кейін құжаттарым мен ақшамды тауып берді", - дейді Денис Чернецкий.

Мәтіннен қате тапсаңыз, бізге жазыңыз