Түркияда көмек көрсетіп жатқан қазақстандық құтқарушының қызы дүниеге келді

Түркиядағы жер сілкінісінің зардаптарын жоюға қатысып жатқан қазақстандық құтқарушының қызы дүниеге келді. Бұл туралы еліміздің Төтенше жағдайлар министрлігі Telegram-дағы ресми арнасында хабарлады.

"Түркиядағы жойқын жер сілкінісінің зардаптарын жоюға қатысып жатқан қазақстандық құтқарушылардың үлкен командасының құрамындағы ТЖМ Республикалық жедел-құтқару жасағының бас құтқарушысы Біржан Байқұловтың бүгін Алматыда қызы дүниеге келді. Оған Ясмина деген есім берген.

Ержүрек құтқарушымызды қызының дүниеге келуімен құттықтаймыз және оған зор денсаулық, ал өзіне Отанына тезірек аман-есен оралуын тілейміз!", - делінген ТЖМ хабарламасында.

Еске сала кетсек, қазіргі таңда Түркияның жер сілкінісі болған аймақтарында қазақстандық құтқарушылардың екі тобы жұмыс істеуде.

Олар зілзаладан кейін із-түзсіз жоғалған адамдарды іздестіруге, төтенше жағдайдың зардаптарын жоюға көмек көрсетуде.

Мақаланың түпнұсқасы: https://kaz.nur.kz/society/2009063-turik-xalqyna-komek-korsetip-zatqan-qazaqstandyq-qutqarusynyn-qyzy-duniege-keldi/