Шымкентте 10 градусқа дейін жылы: бүгін ел аумағында ауа райы қандай болады

Синоптиктер 14 ақпан, сейсенбіде ел аумағы мен Қазақстанның ірі үш қаласы - Алматы, Астана және Шымкентте ауа райы қандай болатынын болжады. Бұл туралы "Қазгидромет" РМК ресми сайтында хабарлады.

Синоптиктердің болжамынша, солтүстік-батыс циклон жырасының әсерінен, бүгін еліміздің батысында, солтүстік-батысында қар, оңтүстігінде, оңтүстік-батысында жауын-шашын (қар, жаңбыр), бұрқасын, желдің күшеюі, батысында, оңтүстігінде көктайғақ күтіледі.

Тек республиканың солтүстік жартысында, орталығында, шығысында, оңтүстік-шығысында күн жауын-шашынсыз болады. Қазақстан бойынша тұман күтіледі.

Сондай-ақ метеорологтардың мәліметінше, бүгін Алматыда күндіз сынап бағанасы +1...+3 градусты көрсетеді, түнде ауа температурасы -5...-7 градусқа дейін төмендейді. Желдің жылдамдығы 0-5 м/с.

Астанада күндіз -10-12 градус аяз болса, түнде термометр көрсеткіші -18...-20 градусқа дейін төмендейді деп күтілуде. Желдің жылдамдағы 2-7 м/с-қа дейін күшеюі ықтимал.

Шымкентте күндіз +8...+10 градус жылы, түнде ауа температурасы 0...+2 градусқа дейін төмендейді деп күтілуде. Мамандар мегаполис тұрғындарына желдің жылдамдығы 8-13 м/с-қа дейін күшеюі мүмкін екенін ескертті.

Метеорологиялық қызметтің болжамына сүйенсек, сейсенбіде Қазақстанның үш мегаполисінде де жауын-шашын күтілмейді.