Синоптиктер Қазақстанның қай өңірінің тұрғындары су тасқынынан сақтану керектігін айтты

"Қазгидромет" РМК мамандары биылғы көктемде Қазақстан бойынша су тасқыны қаупін бағалап, өңірлер бойынша алдын ала болжам жасады, деп хабарлайды KAZ.NUR.KZ.

Синоптиктер Қазақстанның жазық өзендерінде көктемгі су тасқыны ағынының күтілетін көлемі биылғы 1 наурыздағы жағдай бойынша гидрометеорологиялық бақылаулар мен өлшеулер деректері бойынша жасалғанын айтты.

"Қазгидромет" РМК өңделген NASA спутниктерінің ЖҚЗ (Жерді қашықтықтан зондтау) суреттері бойынша 2023 жылғы 1 наурыздағы жағдай бойынша Қазақстанның қарлы аумағы 72 пайызды құрайды", – дейді метеорологтер.

Мамандар жауын-шашынның мөлшерін, қардағы су қорын, топырақтың күзгі ылғалдылығының көрсеткіштерін, топырақтың қату тереңдігін, сондай-ақ өзендердің мұз режимдерін талдай отырып, су тасқыны қауіпті аймақтарға алдын-ала баға берген.

Су тасқыны қаупі жоғары аймақтар: Қарағанды, Ақмола, Солтүстік Қазақстан, Қостанай, Ақтөбе, Батыс Қазақстан, Шығыс Қазақстан, Абай, Алматы және Жетісу облыстары.

Су тасқынының болу ықтималдығы орташа аймақтар: Павлодар, Атырау және Ұлытау облыстары.

Су тасқынының болу ықтималдығы төмен аймақтар: Түркістан, Жамбыл, Қызылорда және Маңғыстау облыстары.

Қарағанды (Нұра өзенін қоспағанда), Ұлытау, Ақмола (Жабай өзенін қоспағанда), Ақтөбе, Батыс Қазақстан және Атырау облыстарындағы ылғал қорының көлемі орташа көпжылдық мәндерден 13-44 пайызға төмен.

Солтүстік Қазақстан және Қостанай облыстарында орташа көпжылдық мәннен 37 пайызға және 74 пайызға жоғары.

"Қазіргі уақытта қар жинау процесі жалғасуда", – деп қосты мамандар.

Наурыз, сәуір айларында метеостанциялардағы көпжылдық бақылауларға сәйкес тәулігіне бір айлық жауын-шашын мөлшері түсуі мүмкін, бұл қауіпті табиғи гидрометеорологиялық құбылыстардың пайда болуына алып келуі мүмкін дейді мамандар.

Консультативтік синоптикалық ауа-райы болжамына сәйкес 2023 жылдың наурызында елдің басым бөлігінде негізінен жылы және жаңбырлы болады деп күтілуде.