Ақтөбе облысының полицейлері қызметтің күшейтілген түріне ауыстырылды

Ақтөбе облысындағы су тасқыны жағдайына байланысты полиция департаментінің жеке құрамы қызмет көрсетудің күшейтілген түріне ауыстырылды, деп хабарлайды облыс әкімдігінің ресми Telegram-арнасы.

Әкімдіктің мәліметінше, полиция департаментінде гарнизонның жеке құрамын жеке қорғаныс құралдарымен (резеңке етік, ОЗК) қамтамасыз ету және халыққа, құтқарушыларға қоғамдық тәртіпті сақтау, сондай-ақ жолдарды жабу бойынша жәрдем көрсетудегі дайындығы тексерілген.

"Сонымен бірге су қоймаларының жағасында орналасқан елдімекендер мен саяжай массивтерін су басқан жағдайда ұрлық пен тонауға жол бермеу бойынша нұсқаулық өткізілді", - делінген хабарламада.

Айта кетейік, бұған дейін Ақтөбеде күн күрт жылынып, жауын-шашын салдарынан қала көшелерін су басқан еді. Сонымен қатар Ақтөбеде осы қыста қар былтырғы жылдан екі есе көп жауған.

"Қазіргі уақытта су тасқынына қарсы іс-шаралар тәулік бойы күшейтілген режимде жалғасуда", - деді әкімдік өкілдері.

Осы ретте Ақтөбе облысының әкімі Ералы Тоғжанов Төтенше жағдайлар департаментінің мамандарымен бірге облыс аумағын ұшып өтіп, су тасқынының алдын алу жұмыстарымен танысты.