"Шай мен нан": ата-аналар Алматыдағы балабақшаның тамағына шағымданды

Алматыда қала тұрғындары мектепке дейінгі мекемедегі балаларының тамағына шағымданды. Желіде бүлдіршіндердің шайға малып, нан жеп отырғаны түсірілген видео тарады, деп хабарлайды KAZ.NUR.KZ.

Egov.Press Telegram-арнасында пайда болған бейнежазбада ер адам "Неге олар балаларына мұндайды бермейді?" деп сұрақ қойған. Ал балалар болса нанның кішкене бөлігін қара шайға батырып, жеп отыр. Ер адам балабақшаның мемлекет меншігінде екенін атап өткен.

Алматы әкімдігі жағдайға қатысты түсініктеме берді. Әңгіме №164 балабақша-бөбекжай туралы болып отырғанын атап өтті.

"Аталған оқиға бойынша егжей-тегжейлі тексеру жүргізу үшін мониторингтік топ құрылды. Мониторинг комиссиясы өз жұмысын 20 наурызға дейін аяқтауы керек. Қазір Алматы қалалық білім басқармасының қызметкерлері мектепке дейінгі ұйымға кетті", – деді әкімдіктегілер.

Мамандар тексеріс нәтижесі туралы кейінірек хабарлауға уәде берді.