Оңтүстік Кореядағы әуежайдан қашып кеткен екінші қазақстандық полицияға өз еркімен барған

Оңтүстік Кореяның Инчхон әуежайынан бірнеше күн бұрын қашып кеткен екінші қазақстандықтың полицияға өз еркімен барғаны белгілі болды. Бұл туралы ақпаратты NUR.KZ тілшісіне Сыртқы істер министрлігі растады.

Сыртқы істер министрлігінің мәліметінше, екі отандасымызға да Қазақстанның Оңтүстік Кореядағы елшілігі қажетті көмек көрсетеді.

"Шекараны заңсыз кесіп өткені үшін іздеуде жүрген екінші Қазақстан азаматы корей полициясына өз еркімен берілді. Қазақстан елшілігі бұл мәселені ерекше бақылауда ұстап отыр және отандастарымызға қажетті барлық консулдық-құқықтық көмек көрсетеді", - дейді Сыртқы істер министрлігінің ресми өкілі Айбек Смадияров.

Айта кетейік, осыған дейін Оңтүстік Корея Республикасына кіруге тыйым салынған 18 және 21 жастағы екі Қазақстан азаматының Инчхон әуежайынан қашып кеткені белгілі болған еді.

Олардың біреуі Теджон қаласында ұсталып, екіншісіне жергілікті полиция іздеу салған болатын.

Мәтіннен қате тапсаңыз, бізге жазыңыз