"Суық тигесін ішіп алдым": Павлодар облысында жұмысына мас болып келген әкім қызметінен қуылуы мүмкін

Павлодар облысында жұмысқа мас күйінде келген ауыл әкімінің басы дауға қалды. Бұл жағдайды облыстық әдеп жөніндегі кеңес мүшелері талқылаған, деп жазады Pavlodarnews.kz.

Екібастұз қаласына қарасты Әлкей Марғұлан атындағы ауылдың әкімі Бауыржан Бозтаевтың жұмыста мас күйінде болғаны туралы ақпарат Мемлекеттік қызмет істері агенттігі төрағасының сенім телефонына ауыл тұрғынынан түскен.

Әдеп жөніндегі уәкіл бұл фактіні тексеруге барған. Ауыл тұрғынының сөзін медициналық сараптама растады.

Бауыржан Бозтаев өзінің бұл әрекетін әкім болып тікелей дауыс беру арқылы сайланғанын және 2023 жылдың 30 қаңтарынан бері қызметте екенін айтып ақталды. Бұған дейін оның басшылық қызметте және мемлекеттік қызметте тәртіптік жазасы болмаған.

"Мен бұл деректі растаймын. 15 наурыз күні ауылды су басты. Түскі астан кешке дейін соны шығарумен айналыстық. Қатты суық тиген соң ішіп алдым. Бұл ісіме қатты өкінемін. Сіздерге және менің ауылымның тұрғындарына осы орында болуға лайықты екенімді дәлелдеу үшін тағы бір мүмкіндік берулеріңізді сұраймын", - деді ауыл әкімі.

Айта кетейік, тұрғындардан Бауыржан Бозтаевты қорғап, өз әкімдеріне қатысты жұмсақ шешім шығаруды сұраған үндеу түскен.

Алайда бұл сөздер әдеп жөніндегі кеңес мүшелерін сендіре алмады. Олар мемлекеттік қызметшінің жұмыс орнында мас күйінде болуын өрескел заң бұзушылық деп санады. Бірауыздан Екібастұз қаласының әкіміне Бауыржан Бозтаевты қызметінен босатуды ұсыну туралы шешім қабылданды.