Жаңбыр, найзағай, шаңды дауыл: Алдағы үш күнде Қазақстанда ауа райы қандай болады

"Қазгидромет" РМК синоптиктері алдағы үш күнге, яғни 4-6 сәуірге арналған ауа райы болжамын ұсынды, деп хабарлайды KAZ.NUR.KZ.

Синоптиктердің болжамынша, алдағы күндері Қазақстанның батыс және оңтүстік өңірлерінде жаңбыр, оңтүстік-шығыстың таулы аймақтарында жауын-шашын жаууы мүмкін.

5-6 сәуірде еліміздің оңтүстігінде, оңтүстік-шығысында қатты жауын-шашын (жаңбыр, қар) жауады деп болжануда.

Сондай-ақ 6 сәуірде Қазақстанның солтүстік-батысында, солтүстігінде жаңбыр жауады деп күтілуде.

Одан бөлек, республика бойынша жел күшейеді, оңтүстік аймақтарда шаңды дауыл тұрып, найзағай ойнауы мүмкін. Ал оңтүстік-шығыстың таулы аймақтарында тұман түседі деп болжануда.

Осы ретте, мамандар ел бойынша температуралық фонда күрт өзгерістер күтілмейтінін атап өтті.