30 градус ыстық, жаңбыр, жел: алдағы үш күнде Қазақстанда ауа райы қандай болады

Синоптиктер алдағы күндері оңтүстік өңірлерде жаңбыр жауып, кейін ауа температурасы +30 градусқа дейін көтеріледі деп болжады. "Қазгидромет" РМК 11-13 сәуірге арналған ауа райы болжамын ұсынды, деп хабарлайды KAZ.NUR.KZ.

Метеорологтардың мәліметінше, алдағы үш күнде еліміздің басым бөлігінде жаңбыр жауып, ауа райы құбылмалы болмақ.

11-12 сәуірде түнде Қазақстанның оңтүстігінде, оңтүстік-шығысында кей уақыттарда қатты жауын-шашын (жаңбыр, қар) жауады.

Бұдан бөлек, синоптиктер еліміздің солтүстік жартысында ауа температурасы түнде -5...-10 градусқа дейін төмендеуі ықтимал деп болжады.

Дегенмен өңірлерде көктемнің жылылығы сезіліп, күндізгі уақытта ауа температурасы біртіндеп жоғарылайды.

13 сәуірде республикамыздың солтүстік жартысында термометр бағаны +10...+18 градусты көрсетсе, ал оңтүстігінде +17...+30 градусқа дейін көтеріледі.

Сонымен қатар республика бойынша тұман, желдің күшеюі, оңтүстік аймақтарда шаңды дауыл мен найзағай, солтүстік жартысында көктайғақ күтілуде.