Найзағай, қар, көктайғақ: алдағы күндері Қазақстанда ауа райы құбылмалы болуы мүмкін

Синоптиктер 20-22 сәуір аралығында Қазақстан бойынша ауа райы тұрақсыз болады деп болжап отыр. Бұл туралы "Қазгидромет" РМК ресми сайтында хабарлады.

Метеорологтардың мәліметінше, алдағы үш күнде батыста және оңтүстік-шығыстың таулы аймақтарында ауа райы құбылмалы болуы ықтимал.

Сонымен қатар 21-22 сәуірде солтүстік пен шығыста, еліміздің оңтүстігінде жаңбыр жауып, найзағай ойнайды. Ал солтүстік, шығыс және оңтүстік-шығыстың таулы аймақтарында жауын-шашын (жаңбыр мен қар түрінде), көктайғақ болады деп болжануда.

Синоптиктер республиканың қалған аймақтарында солтүстік-батыс антициклоны әсерінен күн ашық әрі жауын-шашынсыз болады деп болжайды.

Бұдан бөлек, Қазақстан бойынша тұман, желдің күшеюі, оңтүстік аймақтарда шаңды дауыл күтіледі.